Sağlam qalmaq üçün hər gün 10 min addım atmaq vacib deyil. Alimlərin araşdırmaları göstərir ki, daha az sayda addım da ürək-damar xəstəlikləri və vaxtından əvvəl ölüm riskini azaltmağa kömək edir.
Mütəxəssislər gündə 4000-10 000 addım atmağı tövsiyə edirlər. Lakin müasir araşdırmalara görə, gündəlik 2200-4000 addım belə sağlamlıq üçün faydalı nəticələr verə bilər.
Sidney Universitetinin alimlərinin araşdırmaları göstərir ki, fiziki aktivliyin artırılması ölüm və ürək-damar xəstəlikləri riskinin azalması ilə əlaqəlidir. Sağlamlıq vəziyyəti və fiziki imkanlar nəzərə alınmaqla, gündə təxminən 7000 addım yaxşı hədəf hesab olunur.
Gəzinti orqanizmə necə təsir edir?
Mütəmadi gəzinti ürəyin və qan damarlarının fəaliyyətini yaxşılaşdırır, qan şəkərinin səviyyəsini aşağı salmağa və çəkiyə nəzarət etməyə kömək edir. Eyni zamanda, əzələləri gücləndirir, yuxu keyfiyyətini artırır, stress və narahatlığı azaldır.
Araşdırmalara əsasən, oturaq həyat tərzi keçirən insanlar üçün gündə 4100 addım atmaq belə ölüm riskini təxminən 20 faiz azalda bilər.
Gündəlik addım sayını necə artırmalı?
Bunun üçün xüsusi vaxt ayırmağa ehtiyac yoxdur. Lift əvəzinə pilləkənlərlə qalxmaq, nəqliyyatdan bir dayanacaq əvvəl düşmək, nahar fasiləsində gəzmək və telefonla danışarkən hərəkət etmək gündəlik aktivliyi artırır.
Mütəxəssislər bildirirlər ki, əsas məsələ birdən-birə çox gəzmək deyil, hərəkəti gündəlik vərdişə çevirməkdir. Hətta gün ərzində bir neçə qısa gəzinti də sağlamlıq üçün faydalı ola bilər.
