Artıq çəkidən qısa müddətdə xilas olmaq istəyənlərin ən çox müraciət etdiyi üsullardan biri də qarabaşaq pəhrizidir.
Tibb və diyetologiya mütəxəssisləri bu pəhrizin həm sürətli arıqlama prinsiplərini, həm də insan sağlamlığı üçün yarada biləcəyi ciddi təhlükələri açıqlayıblar. Ekspertlər bildirirlər ki, tərkibi zəngin liflər, B, P qrupu vitaminləri və faydalı minerallarla zəngin olan qarabaşaq orqanizmi toksinlərdən təmizləməyə kömək etsə də, onun uzunmüddətli tək rasion (monopəhriz) kimi qəbulu bədəndə fəsadlara yol aça bilər.
Diyetoloqların rəsmi açıqlamalarına əsasən, bu pəhriz rejimini 5-7 gündən artıq tətbiq etmək və hər altı aydan bir tez-tez təkrarlamaq qətiyyən tövsiyə olunmur. Qaydalara görə, pəhriz müddətində qarabaşaq qaynadılmamalı, axşamdan duzsuz, şəkərsiz və yağsız şəkildə qaynar suda saxlanılaraq dəmlənməlidir. Gün ərzində qəbul edilən suyun miqdarı ciddi şəkildə tənzimlənməli, çəkinin hər kiloqramına uyğun olaraq maye qəbulu artırılmalıdır. Lakin mütəxəssislər xəbərdarlıq edirlər ki, rasionda duz və şəkərin tamamilə məhdudlaşdırılması kəskin baş ağrılarına, arterial təzyiqin dəyişməsinə və qlükoza çatışmazlığı səbəbindən beyin fəaliyyətinin zəifləməsinə gətirib çıxarır.
Həkimlər xüsusi olaraq vurğulayırlar ki, qarabaşaq pəhrizi diabet, hipertoniya, mədə-bağırsaq yarası olan xəstələrə, yeniyetmələrə, həmçinin hamilə və süd verən qadınlara qəti şəkildə qadağandır. Eyni zamanda, pəhriz bitdikdən sonra normal qidalanmaya birdən-bire qayıtmaq olmaz; sonrakı iki həftə ərzində buxarda bişmiş zülallı qidalar, tərəvəzlər tədricən rasiona əlavə edilməli, duz miqdarı az-az artırılmalıdır. Hər hansı bir pəhriz proqramına başlamazdan əvvəl mütləq şəkildə həkim mütəxəssislə məsləhətləşmək lazımdır.
