NASA-nın “Voyager-1” ulduzlararası kosmik zondu orbitə buraxıldığı vaxtdan bəri Yerdən digər bütün kosmik aparatlardan daha uzaq məsafəyə gedib.
Bu barədə “Reuters” məlumat yayıb.
Bildirilib ki, “Voyager-1” mühüm hadisənin astanasındadır: noyabrın 18-də zond Yerdən bir işıq günü məsafəsində yerləşən ilk kosmik aparat olacaq. Bu məsafə təxminən 26 milyard kilometrə bərabərdir.
“Voyager-1” 1977-ci il sentyabrın 5-də kosmosa buraxılıb, onun əkiz aparatı “Voyager-2” isə həmin il avqustun 20-də yola salınıb. Lakin birinci zond bir neçə ay sonra ikinci aparatı geridə qoyub. “Voyager-1” Yupiter, Saturn və onların peykləri haqqında çoxlu sayda yeni məlumatı Yerə ötürüb.
Bundan əlavə, o, heliosferin zərbə dalğasını keçən ilk kosmik aparat olub və 2012-ci ilin avqustunda heliosferin sərhədlərinə — Günəş sisteminin şərti sərhədlərindən birinə çatıb. “Voyager-2” isə orbitə buraxıldıqdan sonra Uran və Neptunu tədqiq etmək məqsədilə fərqli trayektoriya üzrə hərəkət edib.



