Avqustun 3-dən etibarən ABŞ turist və işgüzar vizalar (B-1/B-2) üçün müraciət edən 50 ölkənin vətəndaşları üçün daimi viza girovu tətbiq edəcək.
Girov məbləği 20 min dollara çata bilər və hər bir hal üçün konsulluq işçisi tərəfindən fərdi olaraq müəyyən ediləcək.
Siyahıya digər ölkələrlə yanaşı, Gürcüstan, Qırğızıstan, Tacikistan, Türkmənistan, Əlcəzair, Anqola, Banqladeş, Kamboca, Monqolustan, Nepal, Tunis, Uqanda, Venesuela, Zimbabve və bir sıra digər ölkələr daxildir. Azərbaycan bu siyahıda yoxdur.
ABŞ Dövlət Departamentində izah edilib ki, bu tədbir viza pozuntularının azaldılmasına yönəlib. Viza sahibi göstərilən müddət ərzində ABŞ-ı tərk edərsə, vizadan istifadə etməzsə və ya ölkəyə girişinə icazə verilməzsə, girov geri qaytarılacaq. Şəxs qalma şərtlərini pozarsa, girov müsadirə olunacaq.
Əvvəllər proqram pilot rejimdə fəaliyyət göstərirdi və girov məbləği 5000 dollardan 15000 dollara qədər dəyişirdi. İndi minimum hədd aradan qaldırılıb, maksimum məbləğ isə 20000 dollara qaldırılıb.
ABŞ hakimiyyət orqanlarının məlumatına görə, pilot proqramın ilk 10 ayı ərzində 50-dən az viza pozuntusu qeydə alınıb, halbuki 2024-cü maliyyə ilində siyahıda olan ölkələrin vətəndaşları tərəfindən törədilən təxminən 45500 belə pozuntu qeydə alınıb. Bundan əlavə, məlumata görə, bu ölkələrin vətəndaşlarına verilən vizaların sayı 83 faiz azalıb.
