“Hərbi əməliyyatlar başa çatdıqdan sonra Ukrayna Belarusdan müəyyən kompensasiya almalıdır”.
Bunu Ukrayna Xarici İşlər Nazirliyinin xüsusi tapşırıqlar üzrə səfiri Yaroslav Çernoqor “Apostrof” nəşrinə verdiyi müsahibədə bildirib.
Səfir Belarus tərəfindən “təzminat” ödənilməsi məsələsini “asan olmayan” bir mövzu kimi qiymətləndirib. O, Belarusun “şərikli təcavüzkar” olduğunu bildirib, lakin əlavə edib ki, bu məsələnin həlli hərbi əməliyyatların sonunda Belarusun hansı statusda olacağından çox asılıdır.
“Müəyyən kompensasiya nəzərdə tutulmalıdır. Çox şey müharibənin gedişində bizim hansı Belarusla qarşılaşacağımızdan asılıdır. Hələ müharibənin necə bitəcəyini bilmirik. Hazırda Belarusla informasiya gərginliyimiz var. Bəs real qarşıdurma baş versə və biz hərbi-sənaye kompleksinin məhv edilmiş obyektləri hesabına təzminatımızı alsaq?” – deyə o bildirib.
Mayın sonunda Estoniyanın xarici işlər naziri Marqus Tsaxkna bəyan edib ki, Rusiya dondurulmuş təxminən 210 milyard avroluq aktivlərini geri almayacaq və bu vəsait vurulan zərərin kompensasiyası kimi Ukraynaya verilə bilər.
May ayında Ukraynanın xarici işlər naziri Andrey Sibiqa Belarus prezidenti Aleksandr Lukaşenkonu Rusiyaya qarşı yaradılacaq “xüsusi tribunal” tərəfindən mühakimə olunmalı siyasətçi və məmurlar sırasında göstərib. Həmin ay Ukrayna Prezident Ofisinin rəhbərinin müavini İrina Mudra qeyd edib ki, Ukrayna təkcə Rusiyanı deyil, həm də Belarus, KXDR və İranı mühakimə etməlidir.
