Balıq sağlam qidalanmanın vacib hissəsi olsa da, bəzi növləri sağlamlıq üçün təhlükə yarada bilər. Mütəxəssislər xüsusilə hamilə və süd verən qadınları qılıncbalığı (swordfish) istehlak edərkən ehtiyatlı olmağa çağırırlar.
Qılıncbalığının orqanizmində sinir sisteminə mənfi təsir göstərə bilən metilcivə yüksək miqdarda toplanır.
Balıq ümumilikdə zülal, omeqa-3 yağ turşuları, yod, selen, fosfor və kalsium mənbəyidir. Lakin bütün balıq növləri eyni dərəcədə faydalı deyil. Mütəxəssislər qızılbalıq, sardina, siyənək və treskanı faydalı balıq növləri sırasında göstərirlər.
Qılıncbalığı isə iri yırtıcı dəniz balığıdır. Uzun və iti burun quruluşu ilə seçilən bu balıq adətən tikə və ya dondurulmuş file şəklində satılır.
Onun əsas təhlükəsi tərkibində yüksək miqdarda metilcivənin toplanmasıdır. Bu maddə əvvəlcə dənizdəki planktonlara, daha sonra kiçik balıqlara keçir. Qılıncbalığı digər dəniz canlıları ilə qidalandığı üçün zamanla onun orqanizmində də civənin miqdarı artır. Beləliklə, qida zəncirində yuxarı pillələrdə olan iri yırtıcı balıqlarda zərərli maddələrin konsentrasiyası daha yüksək olur.
Metilcivənin həddindən artıq qəbulu sinir sisteminə mənfi təsir göstərə bilər. Xüsusilə uşaqların sinir sisteminin inkişafı baxımından bu təhlükə daha ciddi hesab olunur. Buna görə də hamilə və süd verən qadınlara qılıncbalığından uzaq durmaq tövsiyə edilir.
Bununla belə, qılıncbalığı yüksək keyfiyyətli zülal, omeqa-3 yağ turşuları, B12 vitamini, selen və D vitamini ilə də zəngindir.
Xatırladaq ki, daha əvvəl dietoloq Mariya Kasas da iri yırtıcı balıqların, o cümlədən qılıncbalığı, göyüzgəcli tuna və durnabalığının qəbulunu məhdudlaşdırmağı tövsiyə etmişdi. Onun sözlərinə görə, civənin toplanması riski səbəbindən bu balıqları tez-tez yemək məsləhət deyil. Həkim heki alternativ kimi heki (merlüz) balığını da tövsiyə edib.
