Rus ordusu müharibə ərzində xüsusilə pilotsuz sistemlərdən istifadə sahəsində sürətlə təcrübə toplayıb
Rusiyanın 2022-ci ildə Ukraynaya hücum edən ordusu ilə indiki ordusu arasında ciddi fərq var.
Bu barədə “forbes.com” nəşri yazıb.
Nəşr yazır ki, dörd ildən artıq davam edən müharibə ərzində Rusiya Silahlı Qüvvələri döyüş meydanında dəyişikliklərə daha tez uyğunlaşmağı və əldə olunan təcrübəni bütün qoşun növlərində tətbiq etməyi bacarıb.
Avstraliyalı istefada olan general-mayor Mik Rayanın sözlərinə görə, müharibə uzandıqca Rusiya ordusu daha sürətli öyrənir. Nəşr qeyd edir ki, bu proses xüsusilə pilotsuz uçuş aparatlarının geniş tətbiqi ilə bağlıdır və Rusiyanın döyüş imkanlarını əhəmiyyətli dərəcədə artırıb.
Məqalədə bildirilir ki, 2024-cü ildə yaradılan “Rubikon” qabaqcıl pilotsuz texnologiyalar mərkəzi bu sahədə əsas rol oynayır. Mərkəz Ukraynanın dron heyətlərini, radioelektron mübarizə sistemlərini və cəbhədən arxadakı logistika marşrutlarını hədəfə almaq üçün yeni taktika hazırlayır.
“Forbes” qeyd edir ki, bu təcrübə artıq digər bölmələrdə də tətbiq edilir. Nəşrin fikrincə, Ukrayna ilə Rusiya arasında dron müharibəsinin nəticəsini yeni texnologiyaları daha sürətlə mənimsəyərək onları sistemli üstünlüyə çevirə bilən tərəf müəyyən edəcək.
