Bəzi gündəlik qidaların həddindən artıq istehlakı göz sağlamlığına mənfi təsir göstərə və görmə problemləri riskini artıra bilər. Mütəxəssislər xüsusilə duz, şəkər və rafinə olunmuş(təmizlənmiş, yad qatqılardan və kəskin qoxudan azad edilmiş bitki yağı) karbohidratlarla zəngin məhsulların qəbulunu məhdudlaşdırmağı tövsiyə edirlər.
Həkim Kris Stil ultra emal olunmuş qidaların və ağ çörək kimi məhsulların tez-tez istehlakının göz sağlamlığı üçün risk yarada biləcəyini bildirib. Bu baxımdan qidaların qlisemik indeksi, duz miqdarı və ümumi qida dəyəri xüsusi əhəmiyyət daşıyır.
Ağ çörək
Ağ çörək rafinə olunmuş karbohidratlarla zəngindir və qan şəkərinin sürətlə yüksəlməsinə səbəb ola bilər. Bəzi tədqiqatlar yüksək qlisemik indeksli qidalarla zəngin qidalanmanı yaşla əlaqəli makula degenerasiyası riski ilə əlaqələndirir. Mütəxəssislər ağ çörəyin əvəzinə tam taxıllı məhsullara üstünlük verməyi məsləhət görürlər.
Kartof fri
Kartof frisinin həddindən artıq istehlakı yüksək miqdarda yağ və duz qəbuluna gətirib çıxara bilər. Duzla zəngin qidalanma qan təzyiqini yüksəldərək gözün torlu qişasındakı qan damarlarına zərər verə bilər. Buna görə də qızardılmış qidaların gündəlik rasionda məhdudlaşdırılması tövsiyə olunur.
Emal olunmuş pendir
Bəzi emal olunmuş pendir növləri yüksək miqdarda natrium ehtiva edir. Həddindən artıq duz qəbulu yüksək qan təzyiqinə səbəb ola bilər. Uzun müddət nəzarətsiz qalan hipertoniya isə torlu qişanın damarlarını zədələyərək hipertonik retinopatiya riskini artıra bilər.
Bekon(duzlanmış və ya hisə verilmiş donuz əti)
Bekon və digər emal olunmuş ət məhsulları çox vaxt duzla zəngin olur. Onların tez-tez və həddindən artıq istehlakı ürək-damar sağlamlığına mənfi təsir göstərə, qan təzyiqinin yüksəlməsinə şərait yarada bilər. Bu dəyişikliklər gözün qan damarlarının sağlamlığı üçün də risk yaradır.
Düyü çörəkləri
Bəzi düyü çörəkləri yüksək qlisemik indeksə malikdir və qan şəkərinin sürətlə yüksəlməsinə səbəb ola bilər. Xüsusilə şəkərli diabeti olan insanlarda qan qlükozasının uzun müddət yüksək qalması torlu qişanın damarlarını zədələyərək diabetik retinopatiyaya gətirib çıxara bilər.
Dietoloq Gidon Sadovskinin qeyd etdiyi kimi, bu qidaların ara-sıra istehlakı mütləq görmə qabiliyyətinin zəifləyəcəyi demək deyil. Əsas məsələ qidalanmanın ümumi balansı və məhsulların nə qədər tez-tez qəbul edilməsidir.
Göz sağlamlığını qorumaq üçün meyvə, tərəvəz, tam taxıllar və digər qida dəyəri yüksək məhsullardan ibarət balanslı qidalanmaya üstünlük vermək, qan təzyiqini və qan şəkərini nəzarətdə saxlamaq vacibdir. Müntəzəm göz müayinələri də görmə problemlərinin vaxtında aşkarlanmasına kömək edir.
