İspaniyada tərk edilmiş bütöv bir kənd 850 min avroya satışa çıxarılıb. Ərazidə yaşayış evləri ilə yanaşı, şəxsi ibadətgah, keçmiş aptek, anbarlar və tennis kortu da var. Lakin bu qeyri-adi əmlakı almaq istəyənləri ciddi təmir xərcləri gözləyir.
İspaniyanın Qalisiya bölgəsində yerləşən kənd 40 min kvadratmetr ərazini əhatə edir. Bu qiymətə alıcı 12 tikiliyə, o cümlədən ümumi sahəsi 2160 kvadratmetr olan 11 yaşayış binasına sahib ola bilər. Evlərdə ümumilikdə 44 yataq otağı və 21 vanna otağı mövcuddur.
Ərazidə həmçinin şəxsi ibadətgah, keçmiş aptek, iki geniş anbar, ümumi sahələri və mətbəxləri olan əsas bina, eləcə də tam ölçülü tennis kortu yerləşir.
Bununla belə, kəndin bütün tikililəri yaşayış üçün yararlı vəziyyətdə deyil. 11 yaşayış binasından yalnız üçü qənaətbəxş durumdadır. Qalan səkkiz bina əsaslı təmir və yenidənqurma tələb edir. Bu isə əmlakın ilkin qiymətindən əlavə, ciddi investisiya qoyuluşunu zəruri edir.
Məlumata görə, kənd 2021-ci ildə 1,11 milyon avroya satışa çıxarılmışdı. Lakin alıcı tapılmadığından qiymət sonradan 850 min avroya endirilib.
İnvestorlar üçün əsas çətinliklərdən biri də kəndin yerləşdiyi ərazidir. Qalisiya Atlantik okeanının sahilindən avtomobillə təxminən üç saatlıq məsafədədir. Bununla belə, kənddən cəmi 33 kilometr aralıda istirahət üçün yararlı göl yerləşir.
Beləliklə, 850 min avroya bütöv kənd almaq imkanı yaransa da, gələcək sahibini yalnız daşınmaz əmlakın alınması deyil, həm də bərpa işləri və turizm layihəsinin gəlirliliyini təmin etmək kimi çətinliklər gözləyir.
