Cəmiyyətin inkişafında gənclərin rolu hər zaman mühüm olub. Xüsusilə incəsənət və mədəniyyət sahəsində yeni istedadların üzə çıxması ölkənin mədəni həyatına böyük töhfə verir. Lakin bəzən istedadlı gənclərin tanınması uzun zaman alır.
Bu mövzu ilə bağlı fikirlərini bölüşən gənc vokal ifaçısı Altun Süleymanov bildirir ki, Azərbaycanda çoxlu istedadlı gənclər var, lakin onların geniş auditoriyaya təqdim olunması üçün daha çox imkanlara ehtiyac var.
“Gənclər arasında çox böyük potensiala malik insanlar var. Onlar illərlə təhsil alır, öz üzərlərində çalışır və sənətlərini inkişaf etdirirlər. Amma bəzən bu istedadların cəmiyyətə təqdim olunması üçün platformalar yetərli olmur,” – deyə o qeyd edib.
Altun Süleymanovun sözlərinə görə, gənc sənətçilərin tanınmasında media və mədəni layihələrin rolu böyükdür:
“Media və müxtəlif layihələr gənclərin tanınmasında mühüm rol oynayır. Əgər gənclərə özlərini göstərmək üçün daha çox imkan yaradılarsa, bu həm onların inkişafına, həm də ölkənin mədəni həyatına müsbət təsir edər.”
O hesab edir ki, gənclərə verilən dəstək gələcəyin güclü sənətkarlarının formalaşmasına xidmət edir.
“Gənclərə inanmaq və onları dəstəkləmək çox vacibdir. Çünki bu günün gənc ifaçıları sabahın böyük sənətkarlarıdır,” – deyə Altun Süleymanov vurğulayıb.
