Sosial şəbəkələrdə turistlərin hava limanlarında pasportlarını alüminium folqaya bükdükləri videolar yayılıb. Buna səbəb biometrik pasportlardakı RFID çiplərinin uzaqdan oxunması və şəxsi məlumatların oğurlanması ilə bağlı narahatlıqdır.
Bu barədə “Mako” nəşri yazıb.
Müasir biometrik pasportlarda sahibinin şəxsiyyətini sürətlə təsdiqləməyə imkan verən RFID çipi yerləşdirilir. Bu çiplərdə fotoşəkil, ad-soyad, doğum tarixi və digər identifikasiya məlumatları saxlanıla bilər.
Pasportun folqaya bükülməsi “Faraday qəfəsi” prinsipi ilə əlaqələndirilir. Alüminium elektromaqnit siqnallarını zəiflədə bildiyi üçün bəzi turistlər bunun RFID çipinin icazəsiz oxunmasının qarşısını alacağına inanırlar.
Lakin mütəxəssislər bu tədbiri lazımsız hesab edirlər. Onların sözlərinə görə, pasport çiplərinin oxunması üçün xüsusi cihaz sənədə çox yaxın məsafədə olmalıdır və real şəraitdə məlumatların gizli şəkildə əldə olunması ehtimalı olduqca aşağıdır.
Bundan başqa, məişət folqası tez qırışır və cırılır. Pasportun daim folqaya bükülməsi sənədin üz qabığına və elektron komponentlərinə də zərər vura bilər.
Mütəxəssislər bildirirlər ki, elektron skanlamadan əlavə qorunmaq istəyənlər bu məqsəd üçün hazırlanmış xüsusi RFID qoruyucu üzlüklərdən istifadə edə bilərlər. Belə örtüklər həm daha davamlıdır, həm də pasportun fiziki zədələnməsi riskini azaldır.
