Son günlərdə Sumqayıt Şəhər Hərbi Komissarlığında baş verən hadisə böyük rezonans doğurdu. Yenicə hərbi xidmətini başa vurmuş bir gənc, əlavə iki aylıq təlim kursuna çağırıldı. Gecikdiyinə görə ona 300 manat cərimə tətbiq edildi. Bu qərar gənci o qədər sarsıtdı ki, o, etirazını ən kəskin şəkildə – özünü alovlamaqla bildirdi.
Hadisə yerində olan şahidlər dərhal müdaxilə etsələr də, gəncin bədəninin böyük hissəsi yanmışdı. Təəssüf ki, təcili yardım vaxtında çatmadı və yaralı Bakıya, Travmatologiya Mərkəzinə aparıldı. Onun sağlamlıq vəziyyəti orta ağırdır.
Bu faciə bir daha göstərir ki, hərbi qaydalarda və çağırış sistemində ciddi çatışmazlıqlar var. Gənclərin psixoloji vəziyyəti nəzərə alınmır, həddindən artıq təzyiqlər faciələrlə nəticələnə bilər.
İctimaiyyət bu hadisəyə səssiz qalmamalıdır. Hərbi komissarlıqlarda insan hüquqlarına hörmət, şəxslərin psixoloji durumuna diqqət yetirilməlidir. Dövlət orqanları bu kimi halların qarşısını almaq üçün tədbirlər görməlidir.
Gəncin sağalmasına ümid edirik və belə faciələrin bir daha təkrar olmamasını tələb edirik!
