Rusiyanın Ukraynaya qarşı apardığı müharibə Kremlin üzərində hərbi, iqtisadi və siyasi təzyiqləri getdikcə artırır.
Moderator.az xəbər verir ki, bu barədə “bloomberg.com” nəşri yazıb.
Nəşr yazır ki, döyüşlərin uzanması, Ukraynanın Rusiya ərazisinin dərinliklərinə endirdiyi zərbələr və iqtisadi problemlər Vladimir Putinin vəziyyətini əvvəlki illərlə müqayisədə daha mürəkkəbləşdirib.
Ukraynanın uzaqmənzilli zərbələri Rusiyanı çətin vəziyyətə salır
Nəşrin məlumatına görə, müharibə artıq cəbhə xətti ilə məhdudlaşmır. Ukrayna uzaqmənzilli pilotsuz uçuş aparatları və raketlərlə Rusiyanın dərinliklərində yerləşən neft emalı zavodlarını, yanacaq infrastrukturunu və digər strateji obyektləri hədəfə alır.
Nəşrin təhlilinə əsasən, 2026-cı ildə Rusiya əhalisinin 70 faizdən çoxunun yaşadığı regionların yarısından çoxunda ən azı bir dəfə hava həyəcanı elan edilib. Rusiya hərbi rəhbərliyi də Ukraynanın artan dron hücumlarından müdafiənin getdikcə çətinləşdiyini etiraf edir.
Yanacaq qıtlığı və iqtisadi problemlər dərinləşir
Məqalədə qeyd olunur ki, Ukraynanın təkrarlanan zərbələri nəticəsində Rusiyanın yanacaq sənayesi ciddi zərər görüb. Beynəlxalq Enerji Agentliyinin məlumatına görə, iyunda Rusiyada gündəlik neft emalı həcmi ötən ilin eyni dövründəki 5,4 milyon bareldən 3,8 milyon barelə enib.
Ölkənin bir çox bölgəsində yanacaq qıtlığı yaranıb, tədarükdə fasilələr və məhdudiyyətlər benzinin bahalaşmasına səbəb olub. Yanacaqdoldurma məntəqələrində uzun növbələr yaranır, eyni zamanda qeyri-qanuni yanacaq bazarı da genişlənir. Bu vəziyyət sentyabrda keçiriləcək parlament seçkiləri ərəfəsində Kreml üçün əlavə risk hesab olunur.
Nəşr bildirir ki, Rusiya iqtisadiyyatı da faktiki olaraq dayanma mərhələsinə daxil olub. Hərbi istehsal artsa da, mülki sənaye sahələrində istehsal və investisiyalar azalır. Yüksək hərbi xərclər inflyasiyanı artırdığı üçün Mərkəzi Bank yüksək faiz dərəcələrini saxlamaq məcburiyyətində qalır.
Diplomatik uğursuzluq və Putinin reytinqinin enməsi
Nəşr yazır ki, Kremlin ABŞ prezidenti Donald Trampın vasitəçiliyi ilə Ukrayna üzrə danışıqlarda güzəştlər əldə etmək ümidləri də doğrulmayıb. Nəticədə Moskvanın diplomatik gözləntiləri özünü doğrultmayıb, müharibənin uzanması isə Rusiyanın hərbi və iqtisadi xərclərini daha da artırıb.
Bunun fonunda Vladimir Putinin reytinqində də azalma müşahidə olunur. VTsİOM-un sorğusuna əsasən, iyulun əvvəlində ona etimad səviyyəsi 72,3 faizə enib. Apreldə isə bu göstərici müharibə başlayandan bəri ən aşağı hədd – 71 faiz olub.
Müstəqil “Levada” Mərkəzinin sorğusu da prezidentin fəaliyyətinə dəstəyin və ölkənin düzgün istiqamətdə inkişaf etdiyini düşünənlərin sayının müharibə dövrünün ən aşağı səviyyəsinə düşdüyünü göstərib.
Nəşr bunu Ukraynanın pilotsuz uçuş aparatları və raket hücumlarının gündəlik həyata təsirinin artması, mobil internet məhdudiyyətləri və təhlükəsizlik məqsədilə tətbiq olunan fasilələrin Rusiya cəmiyyətində narazılığı gücləndirməsi ilə əlaqələndirir.
