Münasibətlərdə bəzən adi görünən ifadələr əslində manipulyasiya vasitəsinə çevrilə bilər. Harvard məzunu, klinik psixoloq və münasibətlər üzrə mütəxəssis Sabrina Romanoff cütlüklər arasında böhranın dərinləşməsinə səbəb olan beş zərərli ifadəni açıqlayıb.
Bu barədə “CNBC” məlumat yayıb.
Mütəxəssisin sözlərinə görə, bu cür ifadələr çox vaxt məsuliyyətdən yayınmaq, qarşı tərəfin hisslərini gözdən salmaq və problemi həll etmək əvəzinə onu ört-basdır etmək məqsədi daşıyır.
“Mən olduğum kimiyəm”
Romanoff bildirir ki, bu ifadə dəyişmək və münasibət naminə üzərində işləmək istəmədiyini göstərir. İnsan öz davranışını xarakterinin dəyişməz hissəsi kimi təqdim edərək dialoqu bağlamağa çalışır.
“Hər şeyə həddindən artıq reaksiya verirsən”
Bu, qarşı tərəfin hisslərini etibarsızlaşdırmaq üçün ən çox istifadə edilən manipulyasiya üsullarından biridir. Belə yanaşma problemin mahiyyətini deyil, emosional reaksiyanı müzakirə mövzusuna çevirir.
“Mən artıq üzr istəmişəm”
Psixoloqun fikrincə, səmimi üzr təkcə “bağışla” demək deyil, eyni zamanda davranışın dəyişəcəyini göstərməkdir. Əks halda üzr istəmək sadəcə mübahisəni bitirmək üçün vasitəyə çevrilir.
“Sənin üçün çox şey edirəm”
Bu ifadə mövcud problemi kölgədə qoyaraq qarşı tərəfdə günahkarlıq hissi yaratmağa xidmət edir. Mütəxəssis hesab edir ki, keçmiş yaxşılıqlar indiki problemlərin müzakirəsinə mane olmamalıdır.
“Sən həmişə hər şeydən narazısan”
Romanoff qeyd edir ki, “həmişə” və “heç vaxt” kimi ümumiləşdirici ifadələr konkret problemi müzakirə etmək əvəzinə qarşı tərəfi günahlandırmağa xidmət edir və konstruktiv dialoqu çətinləşdirir.
Psixoloq vurğulayır ki, sağlam münasibətlərin əsas şərtlərindən biri məsuliyyəti qəbul etmək, qarşı tərəfin hisslərinə hörmətlə yanaşmaq və problemləri manipulyasiya olmadan açıq şəkildə müzakirə etməkdir.
