Banan kalium, vitamin və qida lifləri ilə zəngin olsa da, bəzi insanlarda arzuolunmaz təsirlərə səbəb ola bilər. Xüsusilə böyrək xəstəliyi olanlar və müəyyən dərmanlar qəbul edənlər diqqətli olmalıdırlar.
Eat This nəşrinin məlumatına görə, qidalanma mütəxəssisləri gündəlik banan istehlakı zamanı beş məqama diqqət yetirməyi tövsiyə edirlər.
1. Tez aclıq yarada bilər. Bananın tərkibində zülal və yağ azdır. Buna görə də onu kəsmik və ya fıstıq yağı ilə yemək toxluq hissini uzada bilər.
2. Böyrəklərə təsir edə bilər. Böyrək xəstəliyi olan insanlarda kaliumun orqanizmdən xaric edilməsi çətinləşə bilər. Bu da qanda kaliumun artmasına və ürək ritminin pozulmasına səbəb ola bilər.
3. Şişkinlik yarada bilər. Bəzi insanlarda banan qaz, qarında ağırlıq və həzm narahatlığına səbəb olur. Belə hallarda porsiyanı azaltmaq məsləhətdir.
4. Bəzi dərmanlarla uyğun gəlməyə bilər. Təzyiq və ürək xəstəlikləri üçün istifadə olunan müəyyən preparatlar qanda kalium səviyyəsini artıra bilər. Bu dərmanları qəbul edənlər qidalanma ilə bağlı məhdudiyyətləri həkimlə müzakirə etməlidirlər.
5. Karbohidrat miqdarı yüksəkdir. Orta ölçülü bir bananda təxminən 27 qram karbohidrat var. Buna görə də az karbohidratlı pəhriz saxlayanlar gündəlik qida miqdarını nəzərə almalıdırlar.
Mütəxəssislər bildirirlər ki, əksər sağlam insanlar üçün bananı ölçülü şəkildə yemək təhlükə yaratmır. Əsas məsələ fərdi sağlamlıq vəziyyətini və qəbul edilən dərmanları nəzərə almaqdır.
