Mənim üçün səyahət həmişə uzaq ölkələrə getmək demək olmayıb. Bəzən ən maraqlı yerlər elə öz ölkəmizdə, çox yaxınımızda olur. Sadəcə onları kəşf etmək, görmək və başqalarına da göstərmək lazımdır.
Son illərdə Azərbaycanda turizmə, xüsusilə də yerli turizmin inkişafına göstərilən diqqəti böyük maraqla izləyirəm. Əvvəllər yalnız müəyyən tarixi və təbii məkanlarla tanınan bölgələrimizdə indi bir-birindən maraqlı yeni turizm ideyaları yaranır. Festivallar, aqroturizm məkanları, ailəvi istirahət yerləri, yeni əyləncə və mədəniyyət layihələri ölkəmizi həm yerli sakinlər, həm də xarici qonaqlar üçün daha maraqlı edir.
Mən bir bloqer kimi belə tədbirlərə getməyi xüsusilə sevirəm. Çünki orada sadəcə tədbirə baxıb geri qayıtmırsan. İnsanlarla tanış olursan, söhbət edirsən, yeni dostlar qazanırsan, başqa bloqerlərlə fikir mübadiləsi aparırsan. Ən əsası isə öz ölkəmiz haqqında yeni bir şey öyrənirsən.
Bu yaxınlarda Şamaxıda keçirilən Üzüm və Şərab Festivalı da belə tədbirlərdən biri idi. Üzümçülük və şərabçılıq ənənələrinin, yerli məhsulların, milli mətbəxin və bölgənin turizm imkanlarının bir arada təqdim olunması çox xoş təsir bağışlayır. Belə festivallar mənə görə yalnız əyləncə deyil, həm də bölgənin tarixini, zəhmətini və mədəniyyətini tanıtmaq üçün gözəl fürsətdir.
Gözəl Şamaxı rayonumuzun özündə son dövrdə yaranan yeni məkanlar da insanı təəccübləndirir. Məsələn, alpaka fermasını düşünün. Azərbaycanın dağlıq ərazisində Cənubi Amerikanın And dağlarından olan bu şirin, ala-göz heyvanlarla qarşılaşmaq ilk baxışda bir qədər qeyri-adi görünür. Amma məhz belə fərqli ideyalar insanlarda maraq yaradır.
Kapibaraları görmək üçün də artıq uzağa getmək lazım deyil. Şamaxıda “Nəsimi Bağları” kompleksində fəaliyyət göstərən Capybara Land ölkəmizdə bu istiqamətdə maraqlı yeni turizm məkanlarından biridir. Məncə, belə yerlər xüsusilə uşaqlı ailələr üçün həm əyləncəli, həm də yaddaqalan olur.
Məni sevindirən əsas məsələ isə odur ki, il ərzində belə yeni ideyaların sayı artır. Bu gün bir rayonda festival keçirilir, başqa bir yerdə yeni turizm məkanı açılır, digər bölgədə yerli məhsulların təqdimatı təşkil olunur. Bununla həm rayonların öz sakinləri üçün yeni imkanlar yaranır, həm də turistlərin Azərbaycana baxışı daha da zənginləşir.
Amma bizim turizmimizin ən böyük üstünlüklərindən biri məncə yalnız gözəl təbiətimiz deyil.
Azərbaycan mətbəxi özlüyündə böyük bir səyahətdir.
Dolma, plov, qutab, düşbərə, müxtəlif kabablar, mürəbbələr, paxlava, şəkərbura, qoğal və başqa milli şirniyyatlarımızı dadan xarici qonaqların heyranlığını dəfələrlə müşahidə etmişəm. Bəzən bir turistin üzündəki təəccüb və sevinc uzun-uzadı reklamdan daha çox şey deyir.
Mən özüm də belə tədbirlərdə milli şirniyyatlarımızı, yerli məhsullarımızı, sənətkarlıq nümunələrimizi və bölgələrimizin adət-ənənələrini tanıtmağa çalışıram. Xarici qonaqlarla söhbət edəndə onların Azərbaycan haqqında suallarını cavablandırmaq, bildiklərimi bölüşmək mənə xüsusi zövq verir.
Bloqer olmağın mənim üçün ən gözəl tərəflərindən biri də budur: gördüyünü sadəcə özündə saxlamırsan.
Bir gözəl məkanı çəkirsən, paylaşım edirsən, haqqında danışırsan və bəlkə də sənin paylaşımını görən başqa bir insan növbəti həftə həmin yerə getmək qərarına gəlir.
Bəzən yeni tanış olduğum yerli və xarici bloqerlərlə də Azərbaycan haqqında söhbətlər edirəm. Onlara bölgələrimizi, tariximizi, mədəniyyətimizi, mətbəximizi göstərməyə çalışıram. Hər yeni tanışlıq mənə elə gəlir ki, Azərbaycanın dünyada tanıdılması üçün kiçik bir körpüdür.
Dünya Azərbaycanlılarının Mədəniyyət Mərkəzinin və “Sabitlik və İnkişaf Mərkəzi” İctimai Birliyinin üzvü kimi mən bu istiqamətdə fəaliyyətimi də özüm üçün bir vətəndaşlıq məsuliyyəti hesab edirəm. Ölkəmizin gözəlliklərini, mədəni sərvətlərini və bölgələrimizin imkanlarını tanıtmaq üçün hər birimizin öz imkanları daxilində töhfə verə biləcəyinə inanıram.
Mən Azərbaycanı gəzdikcə bir şeyi daha yaxşı anlayıram: bizim ölkəmizdə hələ kəşf etmədiyimiz çoxlu gözəl yerlər, tanımadığımız maraqlı insanlar və danışılmamış çoxlu hekayələr var.
Ona görə də hər yeni festivalı, hər yeni turizm məkanını maraqla qarşılayıram. Çünki Azərbaycanı tanımaq üçün bəzən sadəcə yola çıxmaq lazımdır.
Bir rayonun küçəsində gəzmək, kənddə yerli insanlarla söhbət etmək, təndir çörəyinin qoxusunu duymaq, milli şirniyyatımızdan dadmaq, üzüm bağlarına baxmaq, dağ havasını içinə çəkmək…
Bunlar sadəcə səyahət deyil. Bunlar öz ölkəni yenidən kəşf etməkdir.
Və mən bir bloqer kimi bu kəşfləri bölüşməkdən, ölkəmin gözəlliklərini həm yerli insanlara, həm də xarici qonaqlara göstərməkdən böyük məmnunluq duyuram.
Mehriban Əliyeva
Bloqer, ictimai fəal
