Neyrotexnologiya şirkəti “REMspace” ilk dəfə aydın yuxu zamanı iki iştirakçı arasında ikitərəfli əlaqə əldə etdiyini iddia edib.
Şirkətin baş direktoru Mişel Raduqa aydın yuxu görmənin psixoloji üstünlükləri haqqında açıqlama verib.
O, bu yuxunun kabusları azaltmağa, fobiyalarla qarşılaşmağa və şəxsi problemləri həll etməyə kömək edə biləcəyini iddia edib. Yeni tədqiqat həmçinin aydın yuxu zamanı yeni bacarıqların inkişaf etdirilməsinin mümkün olduğunu göstərir.
Şirkətin komandası 24 sentyabr 2024-cü ildə aydın yuxu zamanı iki iştirakçı arasında əlaqə qurduqlarını iddia edib. Raduqanın sözlərinə görə, iştirakçılar yuxu görərkən aparıcının qulaqlıq vasitəsilə yaratdığı təsadüfi sözləri qəbul ediblər. Bildirilir ki, iştirakçılardan biri yuxusunda bu sözü təkrarlayıb, ikincisi isə oyandıqdan sonra sözü təsdiqləyib. “REMspace” bunu ikitərəfli yuxu ünsiyyətinin ilk nümunəsi kimi təsvir edib.
Raduqa həmçinin iddia edir ki, komanda elektromiyoqrafiya sensorları vasitəsilə aşkarlana bilən “Remmyo” adlı yuxu dilini inkişaf etdirib. Bu sensorlar yuxu zamanı yaranan müəyyən səsləri qavraya bilir. Bildirilir ki, bu texnologiya yuxu görərkən ünsiyyətə imkan verir, lakin bu nəticələr hələ də ekspertlər tərəfindən nəzərdən keçirilməyib.
