Son dövrlərdə bir sıra iş elanlarında “stresədavamlılıq” tələbinə rast gəlinir. Bu tələbin əks olunduğu iş elanlarının sayı günü-gündən artmaqdadır.
İşəgötürənin bu tələbi qanunidirmi?
Məsələ ilə bağlı danışan Vətəndaşların Əmək Hüquqlarının Müdafiəsi Liqasının sədri Sahib Məmmədov bildirib ki, bəzi iş yerlərində belə tələbin qoyulması qanunidir:
“Dövlət qulluğuna qəbul zamanı müsahibə mərhələsində də işçinin dövlət qulluğuna zəruri olan tələblərə cavab verməsində emosionallıq xüsusiyyəti dəyərləndirilir. Elə iş və xidmət yerləri var ki, bu tələbin qoyulması qanunauyğundur. Lakin bütün bunlar qanunvericiliklə tənzimlənməlidir. Dövlət qulluğunda bu məsələlər tənzimlənir. Özəl müəssisələr də işlə bağlı əlavə tələblər qoya bilər. Amma bu, qanunvericiliyə zidd olmur. Ola bilsin ki, xidmət müəssisəsidir, ortada gərgin iş var. Bankları misal çəkmək olar. Mən özüm neçə dəfə bankda dava salmışam. Görürəm ki, dava salırsan, qarşındakılar dillənmirlər. Kimsə özünü idarə edə bilməsə, sənə qoşulub dava edəcək. Bu da bankın işinə zərər gətirəcək. Əslində, stresədavamlılıq xidmət sahələrində, vətəndaşlarla təmas olan yerlərdə zəruridir”.
Sahib Məmmədov Nazirlər Kabinetinin mövzu ilə əlaqədar qərar qəbul etməli olduğunu düşünür:
“Belə məsələlərdə zərurət varsa, Nazirlər Kabineti qaydalar müəyyənləşdirməlidir. Stresədavamlılıq, fizioloji tələblər hansı iş yerlərində şərt qoyula bilərsə, müəyyən edilə bilər”.
