Rusiya Brüsselə hücum edərsə, NATO üzvü olan ölkələr Moskvanı yerlə-yeksan edəcək.
Bunu Belçikanın müdafiə naziri Teo Franken “De Morgen”ə müsahibəsində bildirib.
Franken vurğulayıb ki, Qərb ölkələri özlərini təhdid etməyə imkan verməməlidir.
“Putinin bir gün Brüsselə qeyri-nüvə raketi atmağa qərar verəcəyindən qorxursanmı?” sualına Belçika Müdafiə Nazirliyinin rəhbəri belə cavab verib: “Xeyr, çünki o zaman o, NATO-nun ürəyinə zərbə endirəcək, biz isə Moskvanı yerlə-yeksan edəcəyik”.
Rusiyanın Belçikadakı səfirliyi bu cür bəyanatları “təxribatçı” və “məsuliyyətsiz” adlandırıb.
“Frankenin sərgüzəştləri, təəssüf ki, Avropanın müharibə partiyasında güclənən… militarist sapmanın təcəssümü kimi xidmət edir”, – Rusiya səfirliyi qeyd edib.
Həmin müsahibədə Franken Putinin Brüsselə raket atmağa cəsarət edəcəyinə şübhə etdiyini bildirib.
Nazirin sözlərinə görə, onu daha çox Rusiya Federasiyasının mümkün hibrid hərəkətləri narahat edir.
