Futzal üzrə Azərbaycan millisi ikinci “Xəzər kuboku”nda iştirak edəcək.
Bu barədə Rusiya Mini Futbol Federasiyasının prezidenti Emil Əliyev “RİA Novosti”yə açıqlamasında bildirib.
“Biz artıq 2021-ci ildə U19 Avropa çempionatını Rusiyanın Nijni Novqorod şəhərində keçirmək istəyimizi bildirmişdik. Həmçinin 2020-ci ildə Həştərxanda ikinci “Xəzər kuboku”nu keçirməyi planlaşdırırıq. Burada Azərbaycan, Rusiya, İran və Qazaxıstandan olan kişilərdən ibarət milli komandalar iştirak edəcək”, – deyə o, vurğulayıb.
Əliyevin sözlərinə görə, həmin ilin 9 May tarixində qadınlararası beynəlxalq turnir ilk dəfə olaraq Moskvada deyil, Nijni Novqorodda keçiriləcək: “Bu, AVRO-2021-ə vəsiqə qazanmazdan əvvəl sınaq rolunu oynayacaq”.
Federasiya prezidenti əlavə edib ki, keçirilən turnir sayca 11-ci olacaq və İkinci Dünya müharibəsində qələbənin 75-ci ildönümü münasibətilə bəzi dəyişikliklər ediləcək.
