Kəlbəcər Rayon İcra Hakimiyyəti başçısı Aqil Məmmədov tender yolu ilə “Mercedes Benz S 350” xidməti avtomobilin alınmasından danışıb.
Aqil Məmmədov unikal.org-a açıqlamasında bildirib ki, dövlət tərəfindən icra hakimiyyətinə 55 min manat xidməti avtomobilin alınması üçün pul ayrılıb:
“2 ildir ki, müavinimin xidməti avtomobili yoxdur. Dövlət bücəsindən xidməti avtomobilin alınması üçün 55 min manat pul ayırldı. Təklif etdim ki, sözügedən məbləğə 2010-cu ilin buraxılışı olan “Mercedes Benz S 350” avtomobili alınsın. İcra hakimiyyəti bunun üçün tender komissiyasına müraciət etdi və tender elan olundu”.
Aqil Məmmədov vurğulayıb ki, artıq sözügedən xidməti avtomobil dəyəri büdcələrinə uyğun olmadığı üçün təxirə salınıb:
“Tenderdə hələlik sözügedən avtomobillər təklif olunmayıb. Təklif olunan avtomobillərin qiyməti çox bahadır. Ona görə, “Mercedes Benz S 350” avtomobilin alınmasını təxirə saldıq”.
Moderator.az-ın qeydi:
Heç bir mərkəzi və yerli icra hakimiyyəti orqanı Prezident Administrasiyasının razılığı, Nazirlər Kabinetinin göstərişi və Maliyyə Nazirliyinin izni olmadan nəinki yeni və ya köhnə avtomobil, heç velosiped də ala bilməz. Sosial şəbəkələrdə və mediada buna görə “stəkanda fırtına qoparanlar” bu həqiqəti ya bilmirlər, ya da bilərəkdən cığallıq edirlər.
