Ağır qəza Bakı-Qazax magistral yolunun Kürdəmirin Xırdapay kəndindən keçən hissəsində qeydə alınıb.

Minik maşını Bakı istiqamətində hərəkətdə olarkən qəfildən sürücü idarəetməni itirib. Avtomobil yoldan çıxaraq bir neçə yüz metr torpaq yolla getdikdən sonra onu alov bürüyüb. Nəticədə sürücü, 60 yaşlı Ağdam rayon, Xındırıstan kənd sakini Vahid Həsənov avtomobildə yanaraq dünyasını dəyişib.

Dərhal hadisə yerinə FHN-in Dövlət Yanğından Mühafizə İdarəsinin texnikası və canlı qüvvəsi cəlb olunub. Yanğın söndürülüb. Meyit avtomobildən çıxarılıb və müayinə olunması üçün Səhiyyə Nazirliyinin Tibbi Ekspertiza və Pataloji Anatomiya Birliyinin Kürdəmir rayon şöbəsinə aparılıb.

Hadisənin hansı səbəbdən baş verməsi hələlik məlum deyil.

Faktla bağlı araşdırma aparılır.

Bərdədəki qəza da ölümlə nəticələnib. Hadisə rayonun Göbər kəndi ərazisində qeydə alınıb. İki avtomobilin toqquşması nəticədə sürücü Elnur Cəfərov dünyasını dəyişib. Bundan başqa 2 nəfər- Behbud Məməmdov və Seymur Cəfərov yaralanıblar. Hər iki yaralı Bərdə rayon Mərkəzi Xəstəxanasına çatdırılıb.