Rusiya-ABŞ-Ukrayna danışıqlarından sonra dolların məzənnəsi 81-83 rubl təşkil edəcək.
Bu proqnozu “Qazeta.Ru”ya “Qarda Kapital” investisiya strateqi Aleksandr Baxtin verib.
“Rusiya, ABŞ və Ukrayna nümayəndələri bu günlərdə münaqişə başa çatdıqdan sonrakı təhlükəsizlik arxitekturasını və ərazi məsələlərini müzakirə edirlər. Mövzular, şübhəsiz ki, həssasdır, lakin hər hansı irəliləyiş gözləmək hələ tezdir. Müşahidələrimizə görə, investorların gözləntiləri təmkinlidir və bunun üçün əsaslar var. Bu, yenidən başladılmış danışıqlar prosesinin ilk görüşüdür və hələlik işçi səviyyəsində keçirilir. Tərəflər konkret konseptual qərarlar qəbul etmək əvəzinə, mövqelərini uzlaşdırır, kompromislər axtarır və növbəti addımları müəyyənləşdirirlər. Hazırda müsbət məqam, ilk növbədə, danışıqların yenidən başlanması faktının özüdür. Buna görə də tərəflərdən ümumi xarakterli açıqlamalar gələcəyi təqdirdə bazarda məyusluq dalğasının və rubl aktivlərinin, xüsusilə də davamlı şəkildə, dəyər itirməsinin baş verəcəyini düşünmürəm”, – Baxtin bildirib.
O əlavə edib ki, gələn həftə APEC sammiti çərçivəsində Rusiya, ABŞ və Çin liderlərinin şəxsi görüşləri nəzərdə tutulub. İnvestisiya strateqinin sözlərinə görə, bu, rublun məzənnəsinə dəstəyi davam etdirə bilər.
Baxtin dəqiqləşdirib ki, hazırda milli valyutaya təzyiq noyabrın 9-dan etibarən Maliyyə Nazirliyinin büdcə qaydası çərçivəsində valyuta alışının həcmini 24 faiz artırması, eləcə də neft qiymətlərinin bir həftə ərzində 10 faizdən çox ucuzlaşması ilə bağlı ola bilər. Eyni zamanda, ekspertin vurğuladığına görə, Mərkəzi Bankın pul-kredit siyasətində fasilə ilin sonunadək davam edə bilər, hazırda isə məzənnədə payızın əvvəlində neftin bir barelinin üçrəqəmli qiymətləri nəzərə alınır.
Baxtinin fikrincə, sanksiyaların yumşaldılmasının rubla təsiri və bu təsirin istiqaməti hansı məhdudiyyətlərin – ixraca, yoxsa idxala tətbiq olunan məhdudiyyətlərin – yumşaldılacağından və ya aradan qaldırılacağından asılı olacaq. İnvestisiya strateqi izah edib ki, ilk növbədə ixraca maneələr aradan qaldırılarsa, rubl möhkəmlənəcək. Əksinə, idxalın asanlaşdırılmasına üstünlük verilərsə, rubl təzyiq altında qala bilər.
Investing.com-un məlumatına görə, Bakı vaxtı ilə saat 17:57-də birjadankənar bazarda dolların məzənnəsi 82,99 rubl təşkil edib.
Noyabrın 10-da Əbu-Dabidə Rusiya, Ukrayna və ABŞ arasında münaqişənin nizamlanmasına dair iki günlük danışıqlara başlanılıb. Rusiya nümayəndə heyətinə prezidentin köməkçisi Vladimir Medinski, Ukrayna nümayəndə heyətinə isə Rustem Umerov rəhbərlik edir. ABŞ-ı Stiv Uitkoff və Cared Kuşner təmsil edirlər. Müzakirə mövzuları arasında təhlükəsizlik zəmanətləri, gərginliyin azaldılması tədbirləri və humanitar məsələlər yer alır. Görüşün ilk günü təxminən 4,5 saat davam edən danışıqlardan sonra başa çatıb. Danışıqların noyabrın 11-də davam etdirilməsi planlaşdırılır.
