Pişiklər min illərdir insanlarla birlikdə yaşasalar da, onların bir çox davranış və qabiliyyətləri elm üçün hələ də maraq doğurur. Son araşdırmalar bu heyvanların düşündüyümüzdən daha mürəkkəb xüsusiyyətlərə sahib olduğunu göstərir.
Bu barədə “Science Focus” portalı məlumat yayıb.
Portsmut və Sasseks universitetlərinin alimləri müəyyən ediblər ki, pişiyə yavaş-yavaş göz qırpmaq onunla ünsiyyət qurmağın təsirli yollarından biridir. Pişiklər bu hərəkətə çox vaxt eyni şəkildə cavab verir və tədqiqatçılar bunu insanla heyvan arasında etimadın göstəricisi hesab edirlər.
Araşdırmalar həmçinin pişiklərin sahiblərinə emosional bağlılıq yarada bildiyini göstərib. Sahibindən uzun müddət ayrı qalmaq bəzi pişiklərdə narahatlıq, həddindən artıq miyoldama, aqressiya və dağıdıcı davranışlara səbəb ola bilər.
Pişiklərin başqa bir maraqlı qabiliyyəti hava dəyişikliklərini insanlardan daha tez hiss etmələridir. Güclü eşitmə və qoxu duyğuları, eləcə də atmosfer təzyiqindəki dəyişikliklərə həssaslıqları onların yaxınlaşan tufanı əvvəlcədən hiss etməsinə imkan verə bilər.
Bu heyvanların bığları da sadəcə tük deyil. Həssas bığlar ətraf mühitdəki dəyişiklikləri hiss etməyə, qaranlıqda istiqamətlənməyə və ov zamanı hərəkətləri müəyyənləşdirməyə kömək edir.
Pişiklərin qutuları sevməsinin də izahı var. Qapalı məkan onlara təhlükəsizlik hissi verir və bədən istiliyini qorumağa kömək edir. Pişiklər günün böyük hissəsini yataraq və dincələrək keçirə bilirlər.
Alimlərin araşdırmaları göstərir ki, pişiklərin insanlarla münasibəti yalnız qida əldə etməklə bağlı deyil. Minilliklər ərzində formalaşan bu əlaqə nəticəsində onlar insanlarla sosial və emosional münasibətlər qurmaq qabiliyyəti də inkişaf etdiriblər.
