Wi-Fi siqnalının zəif olması hər zaman routeri dəyişdirmək və ya daha güclü cihaz almaq demək deyil. Bəzən sadə və evdə olan materiallardan istifadə etməklə simsiz internetin müəyyən ərazilərdə əhatəsini yaxşılaşdırmaq mümkündür.
Bu barədə “Jurnalul.ro” məlumat yayıb.
Mütəxəssislərin diqqət çəkdiyi üsullardan biri routerin arxasında alüminium folqadan reflektor kimi istifadə etməkdir. Folqa qövs formasına salındıqda radio dalğalarının bir hissəsini əks etdirərək onları müəyyən istiqamətə yönəldə bilər.
Bu proses müəyyən mənada güzgünün iş prinsipinə bənzəyir. Güzgü işığı artırmır, sadəcə onun istiqamətini dəyişir. Alüminium folqa da Wi-Fi siqnalını gücləndirməkdən daha çox onun yayılma istiqamətini dəyişə bilər.
Bu üsul xüsusilə router xarici divarın yaxınlığında yerləşdikdə və siqnalın evin müəyyən hissəsinə – məsələn, yataq otağına, iş otağına və ya qonaq otağına daha yaxşı çatması tələb olunduqda faydalı ola bilər.
Dartmut Kollecinin tədqiqatçıları tərəfindən aparılan araşdırmada istiqamətləndirici metal reflektorlardan istifadə etməklə müəyyən ərazilərdə Wi-Fi siqnalının 55,1 faizə qədər yaxşılaşdırılması, lazımsız istiqamətlərdə isə siqnalın 63,3 faizə qədər azaldılması mümkün olub.
Lakin bu nəticələrin ev şəraitində adi alüminium folqa ilə eyni şəkildə əldə ediləcəyinə zəmanət yoxdur. Effektivlik routerin yerləşdiyi yerdən, folqanın formasından, ölçüsündən və otağın quruluşundan asılıdır.
Necə etmək olar?
Təxminən 30 santimetr uzunluğunda, routerin hündürlüyünə uyğun bir alüminium folqa götürün. Folqanı qövs və ya “C” formasında bükərək routerin arxasına yerləşdirin. Reflektoru Wi-Fi siqnalının zəif olduğu istiqamətə doğru yönəldin.
Nəticəni yoxlamaq üçün folqanı yerləşdirməzdən əvvəl və sonra problemli ərazidə internet sürətini ölçmək məsləhətdir. Beləliklə, üsulun məhz sizin evinizdə nə dərəcədə effektli olduğunu müəyyən edə bilərsiniz.
Mütəxəssislər qeyd edirlər ki, folqa routerin ötürücü gücünü artırmır. Sadəcə siqnalın istiqamətini dəyişir. Buna görə də bir otaqda siqnal yaxşılaşarkən digər istiqamətdə zəifləyə bilər.
Eyni prinsipə əsasən, müxtəlif metal səthlərdən də reflektor kimi istifadə etmək mümkündür. Əsas məqsəd əyri metal səth yaratmaq və onu Wi-Fi siqnalını ehtiyac duyulan istiqamətə yönəldəcək şəkildə yerləşdirməkdir.
Beləliklə, routerinizin dəyişdirilməsinə qərar verməzdən əvvəl bu sadə üsulu sınamaqla heç bir xərc çəkmədən Wi-Fi əhatəsini yaxşılaşdırmağa cəhd edə bilərsiniz.
