Son dövrlərdə Azərbaycanın regionlarında vətəndaşların sosial-iqtisadi vəziyyəti, infrastruktur problemləri və dövlət qurumları ilə qarşılıqlı əlaqələri ilə bağlı çoxsaylı müraciətlər qeydə alınır. Bu baxımdan, İctimai Nəzarət Koalisiyası (İNK) və Sabitlik və İnkişaf Mərkəzinin sədri, həmçinin Dünya Azərbaycanlıları Mədəniyyət Mərkəzinin Prezidenti Rasim Məmmədovun Şəmkir, Tovuz, Ağstafa və Qazax rayonlarına səfəri böyük əhəmiyyət kəsb edir.
Uzun fasilədən sonra 26 iyun 2025-ci il tarixdə həyata keçirilən səfər zamanı Rasim Məmmədov İNK-nın regional nümayəndələri ilə bir araya gələrək, qurumun yerli səviyyədəki fəaliyyəti və vətəndaşlara göstərilən dəstək haqqında məlumat alıb. Vətəndaşların təşəbbüsü ilə Ağstafa rayonunda keçirilən iclasda Şəmkir, Tovuz, Qazax və Ağstafa şöbələrinin əməkdaşları və könüllüləri iştirak ediblər. Tədbir çərçivəsində Heydər Əliyevin xatirə abidəsinə çiçək qoyularaq Ümummilli Liderin xatirəsini hörmətlə yad edilib.
Həmçinin, rayon və kənd sakinləri, şəhid ailə üzvləri, qazilər ilə birbaşa dialoq quraraq, onların ictimai xidmətlər, sosial ədalət, infrastruktur çatışmazlıqları və digər aktual məsələlərlə bağlı müraciətlərini dinləyib.
Səfər çərçivəsində xüsusi diqqət kənd təsərrüfatı, təhsil, tibbi xidmət və yol-infrastruktur problemlərinə yönəldilib. Rasim Məmmədov bu problemlərin həlli üçün müvafiq dövlət qurumları ilə əlaqə yaradılacağını və vətəndaşlara hüquqi yardım göstəriləcəyini bildirib.
İctimai Nəzarət Koalisiyası son illərdə ölkənin müxtəlif bölgələrində vətəndaş hüquqlarının qorunması, korrupsiya ilə mübarizə və ictimai nəzarətin gücləndirilməsi istiqamətində işlər görməkdə davam edir. Qurumun regional nümayəndələri yerli problemləri qeydiyyata alaraq, onların həlli üçün mərkəzi ofislə sıx əməkdaşlıq edirlər.
Rasim Məmmədovun qərb rayonlarına səfəri vətəndaşlarla birbaşa əlaqə qurmaq və problemlərin yerində həllinə kömək etmək baxımından uğurlu addım hesab edilə bilər. İNK kimi qurumların fəaliyyəti ictimai nəzarətin gücləndirilməsində və vətəndaşların dövlət qurumlarına etimadının artırılmasında mühüm rol oynayır. Gələcəkdə də bu cür səfərlərin davam etdiriləcəyi gözlənilir.
Əlavə məlumat üçün İNK-nın rəsmi saytı və sosial media hesablarına müraciət edə bilərsiniz.
