Əgər NATO Rusiya ilə paralel olaraq yenidən silahlanmasa, o zaman Ukraynada müharibə bitdikdən sonra altı ay ərzində Moskva yeni işğala hazır olacaq.
Bu barədə Danimarka Müdafiə Nazirliyinin Baş Kəşfiyyat İdarəsi məlumat yayıb.
Məxfi olmayan məlumatlara görə, hazırda NATO-ya hərbi hücum təhlükəsi yoxdur, lakin növbəti bir neçə il ərzində təhlükə artacaq.
“Genişmiqyaslı müharibənin əvvəlində Rusiya ordusunda əsaslı yenidənqurma və islahatlara başladı və 2024-cü ildə NATO ilə bərabər döyüşə bilmək üçün güclü şəkildə silahlandı. Çinin maliyyə və maddi dəstəyi, həmçinin Şimali Koreya və İrandan silah və qoşun təchizatı ona öz resurslarını tam səfərbər etməyə kömək edir. Rusiya özünü Qərblə konfliktdə görür və NATO-ya qarşı müharibəyə hazırlaşır. Bu o demək deyil ki, müharibəyə başlamaq qərarı verilib, amma Rusiya silahlanır və belə bir qərar qəbul etmək potensialını inkişaf etdirir”, – kəşfiyyat məlumatlarında bildirilib.
Qeyd edilib ki, Rusiya hələ də NATO-nun 5-ci maddəsini işə sala biləcək hərəkətlərdən qaçmağa çalışır, lakin güc balansı dəyişərsə, risk arta bilər. Məsələn, Moskva Alyansı zəifləmiş və ya siyasi cəhətdən parçalanmış hesab edərsə, bir və ya bir neçə Avropa ölkəsinə qarşı regional müharibə aparmağa qərar verəcək. Xüsusən də ABŞ-ın bu münaqişədə Avropaya dəstək verməyəcəyini düşünürsə.
Hesabatda deyilir ki, Rusiya Federasiyasından real hərbi təhlükə həm də Ukraynada müharibənin inkişafından asılıdır. Kəşfiyyat orqanları Moskvanın ukraynalılara və bir və ya bir neçə NATO ölkəsinə qarşı eyni vaxtda döyüşə biləcəyini çətin hesab edirlər. Lakin müharibə dayandırıldıqdan və ya dondurulduqdan sonra Kreml əhəmiyyətli hərbi resursları səfərbər edə biləcək.
Danimarka kəşfiyyatının hesablamalarına görə, NATO kifayət qədər sürətlə silahlanmasa, Ukraynada müharibə bitdikdən sonra aşağıdakı ssenarilər mümkündür:
– 6 aydan sonra Rusiya qonşu ölkələrdən birində lokal müharibə apara biləcək;
– Təxminən 2 ildən sonra bir və ya bir neçə NATO ölkəsi üçün real təhlükə yaradacaq, yəni Baltik dənizi regionunda bir neçə dövlətə qarşı regional müharibəyə hazır olacaq;
– Təxminən 5 ildən sonra Moskva Avropa qitəsində ABŞ-ın iştirakı olmadan genişmiqyaslı müharibəyə hazır ola bilər.
