ABŞ-ın 47-ci prezidenti seçilən Donald Trampın Livanda İsraillə “Hizbullah” arasında atəşkəs üçün hazırlanan layihəyə “yaşıl işıq” yandırdığı bildirilib.
Bu barədə İsrailin dövlət televiziyası “KAN” məlumat yayımlayıb.
Qeyd olunur ki, Tramp noyabrın 10-da İsrailin strateji işlər naziri Ron Dermerlə görüşüb.
Trampa yaxın şəxslərin də qatıldığı görüşdə Livanda atəşkəsin əldə olunması da daxil olmaqla bir çox mövzunun müzakirə edildiyi vurğulanıb.
Görüşdə Dermer Livanda atəşkəsə nail olmaq üçün hazırlanan layihə haqqında Trampı məlumatlandırıb və o, layihəni bəyənərək “Livanla bağlı razılaşmanızı istəyirəm, heç bir etirazım yoxdur” deyib.
Bildirilib ki, ABŞ-ın Livandakı səfiri Liza Conson Vaşinqton tərəfindən hazırlanan və “Hizbullah” ilə İsrail arasında qarşıdurmanı dayandıracaq ilk atəşkəs layihəsini Livan parlamentinin sədri Nebih Berriyə çatdırıb.
