Azərbaycanın Qarabağ bölgəsində qanunsuz silahlı birləşmələr yaradaraq onların fəaliyyətini təşkil edən, özlərini qondarma “Dağlıq Qarabağ Respublikasının prezidentləri” və “prezidenti vəzifəsinin müvəqqəti icraçısı” kimi təqdim edən Arkadi Qukasyan, Bako Saakyan, Arayik Arutyunyan, David İşxanyan və digərlərinin istintaqları davam edir.
Bunu açıqlamasında Azərbaycanın Baş prokuroru Kamran Əliyev deyib.
O söyləyib ki, istintaq beynəlxalq konvensiyalara, standartlara və Azərbaycanın daxili qanunvericiliyinə uyğun olaraq aparılır.
“İstintaqın nəticəsi barədə Azərbaycan ictimaiyyətinə məlumat veriləcək. Qeyd etməliyəm ki, heç bir cinayət cəzasız qalmır. Cəzanın labüdlüyü, cəzasızlıq mühitinin olmaması bütün dövlətlərdə, sahələrdə vacibdir, o cümlədən haqqında danışdığım hallarla bağlı”, – K.Əliyev vurğulayıb.
Qeyd edək ki, Azərbaycan Baş prokurorunun rəhbərlik etdiyi nümayəndə heyəti Türk Dövlətləri Təşkilatına (TDT) üzv dövlətlərin Baş Prokurorları Şurasının 2-ci iclasında iştirak etmək məqsədilə Ankara şəhərinə işgüzar səfərdədir.
