Bakı Beynəlxalq Avtovağzalından bəzi rayonlarımıza avtobusla sərnişin daşıma xidməti həyata keçirilmir. Belə ki, Sabirabad, Saatlı, Beyləqan, Masallı, Oğuz, İsmayıllı və digər bir neçə rayona avtobus reysləri hələ də yoxdur. Bu da həmin bölgələrə səfər edənlərin həm əlavə pul xərcləmələrinə, həm də vaxt itkilərinə səbəb olur.
Rayonlara sərnişin daşıma ilə məşğul olanlar deyir ki, sözügedən rayonlara sərnişinlərin gediş-gəlişi elə də çox deyil. Ona görə də həmin istiqamətlərə birbaşa reyslər açılmır.
Dövlət Avtomobil Nəqliyyatı Xidmətindən isə sorğumuza cavab olaraq bildirildi ki, avtobus reyslərinin təşkili sərnişin axınına və daşıyıcıların rentabelliyinə uyğun həyata keçirilir.
