İranda müğənni Pərəstu Əhmədi və onun prodüser komandasının üzvləri hicabsız çıxış etdiklərinə görə 74 şallaq zərbəsi cəzasına məhkum ediliblər.
Bu barədə “The Guardian” nəşri məlumat yayıb.
2024-cü ilin dekabrında 29 yaşlı Əhmədi özünün “YouTube” kanalında canlı yayımda “Az Khoone Javanane Vatan” adlı vətənpərvərlik mahnısını ifa edib. İfa qısa müddətdə populyarlaşaraq milyonlarla baxış toplayıb, lakin sənətçi çıxış zamanı baş örtüyü taxmayıb.
Nəticədə o, şallaq cəzasına məhkum olunub. Qum əyalətinin məhkəməsi, həmçinin ictimai əxlaqı təhqir etdiyi əsası ilə ifaçıya iki il müddətinə ölkəni tərk etməyi və yaradıcılıq fəaliyyəti ilə məşğul olmağı qadağan edib. Yayımlanan video “bayağı və əxlaqsız məzmun” kimi qiymətləndirilib.
