Bu gün İranın Xarici İşlər Nazirliyində yeni mətbuat katibinin kollektivə təqdimatı keçirilib.
Təqdimatı nazir Məhəmməd Cavad Zərif açaraq Səid Hətipzadəni mətbuat katibi vəzifəsinə təyin etdiyini bildirib və ona yeni vəzifəsində uğurlar arzulayıb. Tədbirdə İranın Azərbaycana yeni təyin olunan səfiri Seyid Abbas Müsəvi də iştirak edib. Nazir S.A. Müsəvini də səfir təyin olunması münasibətilə təbrik edib və ona tövsiyələrini verərək İran- Azərbaycan münasibətlərinə toxunub.
Qeyd edib ki, Azərbaycan ilə İran xalqları ortaq tarixə, mədəniyyətə, dinə və milli-mənəvi dəyərlərə malikdirlər. Bu faktlar dövlətlərin yaxınlaşmasını və qarşılıqlı faydalı əməkdaşlıq əlaqələrinin genişləndirilməsini tələb edir. Azərbaycan İranın yaxın qonşusu, dostu və qardaşıdır. Azərbaycan İran üçün əhəmiyyəti dövlətdir və rəsmi Tehran Bakı ilə əməkdaşlıq əlaqələrinin daha da inkişafına xüsusi önəm verir: “Bu gün bizim əməkdaşlıq əlaqələrimiz yüksələn xətlə inkişaf edir. Azərbaycan İranın əziz qardaşıdır”.
Nazir əmin olduğunu bildirib ki, S.A. Müsəvi İran-Azərbaycan əlaqələrinin inkişafı istiqamətində uğurlu addımlar atacaq.
