Birləşmiş Millətlər Təşkilatı güclənməkdə olan El-Nino (El-Nino Sakit okeandakı suyun həddindən artıq isinərək dünyanın hava sistemini dəyişdirməsidir-red) hadisəsinin dünya üzrə quraqlıq, daşqın, meşə yanğınları və güclü tayfunlara səbəb ola biləcəyi barədə xəbərdarlıq edib.
Ümumdünya Meteorologiya Təşkilatının son məlumatlarına əsasən, hazırkı El-Nino son 70 ilin ən güclüsü ola və ən azı 2027-ci ilin fevralına qədər davam edə bilər.
BMT-nin Baş katibi Antonio Quterreş dünyanın ekstremal hava hadisələrinin baş verə biləcəyi “təhlükəli zonaya” daxil olduğunu bildirib. Onun sözlərinə görə, El-Nino getdikcə böyüyür və planet indiyə qədər müşahidə olunmayan iqlim şəraiti ilə üzləşir.
El-Nino Sakit okeanda yaranan və küləklərin istiqamətini dəyişdirən təbii hava hadisəsidir. Bu proses isti suyun şərqə doğru yayılmasına və atmosferə əlavə istilik ötürülməsinə səbəb olur. İnsan fəaliyyəti nəticəsində yaranan qlobal istiləşmə isə onun təsirlərini daha da ağırlaşdıra bilər.
Sakit okeanın əsas müşahidə bölgəsində səth temperaturu son həftələrdə normadan 2 dərəcədən çox yüksək olub. Proqnozlara görə, yaxın aylarda fərq 4 dərəcəyə çata bilər. Okeanın dərin qatlarında isə bəzi ərazilərdə temperatur normanı 8 dərəcədən çox üstələyib.
Cənub-Şərqi Asiya, Mərkəzi Amerika və Cənubi Amerikanın şimalında yağıntıların azalacağı, quraqlıq və meşə yanğınları riskinin artacağı gözlənilir. İndoneziyada quru mövsüm ərzində 107 min hektardan çox ərazi yanıb. Panama kanalı rəhbərliyi də yağıntıların azalması səbəbindən buradan keçən gəmilərin sayını 10 faizdən çox azaltmağa hazırlaşır.
Çində isə il ərzində yeddi tayfunun sahilə çatacağı proqnozlaşdırılır. Şərqi Afrika, Braziliyanın cənubu və ABŞ-ın cənub bölgələrində normadan artıq yağıntıların daşqın və torpaq sürüşməsi təhlükəsini artıracağı bildirilir.
Ümumdünya Meteorologiya Təşkilatı risk altında olan ölkələrdə erkən xəbərdarlıq sistemlərinin gücləndirildiyini açıqlayıb. Mütəxəssislər əhalini təşvişə düşməməyə, lakin mümkün fəlakətlərə əvvəlcədən hazırlaşmağa çağırıblar.
