İtlərin insanlarla ünsiyyəti ilə bağlı aparılan yeni araşdırma maraqlı nəticə ortaya çıxarıb. Məlum olub ki, itlər xüsusilə sahiblərinin göz qırpmasını gördükdə daha çox gözlərini qırpırlar.
Parma Universitetinin alimləri 35 müxtəlif cinsdən olan itin davranışını araşdırıblar. Tədqiqat zamanı itlərə 40 saniyəlik videolar göstərilib. Videolarda növbə ilə itin sahibi və iki yad insan yer alıb. Bir videoda insanlar hər üç saniyədən bir gözlərini qırpıb, digərində isə kameraya baxaraq gözlərini qırpmayıblar.
Nəticələr göstərib ki, itlər insanların göz qırpmasını gördükdə daha çox gözlərini qırpırlar. Lakin bu reaksiya əsasən sahiblərinə münasibətdə müşahidə olunub, yad insanlara qarşı eyni hal qeydə alınmayıb.
Alimlərin fikrincə, bu, itlərin qarşı tərəfin sosial əhəmiyyətini nəzərə aldığını göstərə bilər. Göz qırpması normalda gözləri qorumaq və nəmləndirmək üçün avtomatik baş verən proses olsa da, onun insanlar və itlər arasındakı qarşılıqlı əlaqədə sosial əhəmiyyət qazana biləcəyi ehtimal edilir.
Tədqiqatın müəllifi Kyaara Kanori vurğulayıb ki, bu nəticələr itin hər göz qırpmasının konkret mesaj daşıdığını sübut etmir. Sadəcə, itlərin insan üzündəki çox incə siqnallara, o cümlədən göz qırpmasına həssas olduğu və davranışlarının ünsiyyətdə olduqları şəxsdən asılı olaraq dəyişə bildiyi müəyyənləşdirilib.
Mütəxəssislər bildiriblər ki, gələcək araşdırmalarda insanların da itlərlə ünsiyyət zamanı göz qırpma tezliyinin dəyişib-dəyişmədiyini öyrənmək maraqlı olardı.
