Azərbaycanda yeni meyyarlarla pensiya təyinatına başladıqdan sonra əlilliyə görə pensiya alanların sayında artım qeydə alınıb. Belə ki, bu ilin yeddi ayında əlilliyə görə pensiya alanların sayı 16.4 faiz artaraq, 215,200 nəfər olub. Yeni meyyarlar eyni zamanda pensiyaların artmasına da səbəb olub.
Bunu Milli Məclisin deputatı Vüqar Bayramov deyib.
O bildirib ki, bütövlükdə pensiyalarda, o cümlədən əlilliklə bağlı pensiyalarda artım qeydə alınıb.
“Bu ilin ilk yeddi ayında pensiya məbləği 18.2 faiz artıb. Orta pensiya məbləği 435 manat olub. Bu da bütövlükdə minimum pensiya məbləğinin və əlilliyə görə pensiya məbləğinin artması ilə bağlıdır. Bu baxımdan yeni meyyarlar tətbiq olunduqdan sonra həm əlilliyə görə pensiya alanların sayında, həm də bütövlükdə orta pensiya məbləğində artım qeydə alınıb”, – deyə deputat əlavə edib.
Qeyd edək ki, 2022-ci il iyulun 1-dən Azərbaycanda əlillik dərəcələri yeni meyyarlarla təyin edilir. Belə ki, “Əlilliyi olan şəxslərin hüquqları haqqında” qanuna edilən dəyişikliyə əsasən, I, II və III qrup kimi əlillik göstəricisi ləğv olunub.
Əlillik orqanizmin funksiyasının itirmə dərəcəsinə görə, yəni faizlə müəyyən edilir. Orqanizmin funksiyasının 30-60 faiz itirilməsi III qrup, 60-80 faiz itirilməsi II qrup, 80-100 faiz itirilməsi isə I qrup hesab olunur.
Bununla yanaşı, əvvəlki qaydalara əsasən, əlillik 150-160 xəstəlik üzrə müəyyən edilirdi, lakin yeni qaydalarda bu xəstəliklərin sayı 800-ə qədər artırılıb. Yəni 150-160 yox, 800-ə yaxın xəstəlik üzrə əlillik faizi almaq mümkündür. Elə xəstəliklər var idi ki, onlara əlillik düşmürdü, amma yeni meyyarlarda həmin xəstəliyi olan insanlara da əlillik təyin edilir.
