Gündəlik istifadə etdiyimiz qabyuyan yuyucu vasitələr düzgün tətbiq edilmədikdə sağlamlıq üçün müəyyən risklər yarada bilər. Xüsusilə qabların səthində qalan yuyucu vasitə qalıqları diqqət çəkir.
Bu barədə diyetoloq Tatyana Yarmoşuk sosial şəbəkələrdə məlumat verib.
Mütəxəssisin sözlərinə görə, qablar kifayət qədər yaxalanmadıqda yuyucu vasitənin bəzi komponentləri boşqab, fincan və digər mətbəx əşyalarının səthində qala bilər. Bu qalıqlar qida və içkilərlə birlikdə orqanizmə daxil ola bilər.
Bundan əlavə, güclü ətirli və çoxsaylı əlavələr ehtiva edən məhsullar həssas dərisi olan insanlarda quruluq, qızartı və qıcıqlanmaya səbəb ola bilər.
Mütəxəssis qabları yuyucu vasitədən sonra ən azı 2-3 dəqiqə isti axar su altında yaxalamağı tövsiyə edir. Qabyuyan maşından istifadə də yuyucu vasitə qalıqlarının azalmasına kömək edə bilər.
Yuyucu vasitə seçərkən yalnız onun təmizləmə gücünə deyil, tərkibinə, istifadə qaydalarına və təhlükəsizlik məlumatlarına da diqqət yetirmək vacibdir. Ən əsası isə məhsulun tövsiyə olunan miqdarından artıq istifadə etməmək və qabları yaxşıca yaxalamaqdır.
