Azərbaycanın Ermənistandan dəqiq mina xəritələri, işğal altında qalan kəndlərin geri qaytarılmasını, üçtərəfli bəyanatda qeyd olunan şərtlərə əməl olunmasını tələb etməsi Ermənistanda qorxu yaradıb.
Erməni ekspertlər iddia edirlər ki, Azərbaycanın məqsədi Naxçıvanla əlaqə yaratmaq üçün Ermənistandan torpaq qoparmaqdır. Baxmayaraq ki, Azərbaycan hakimiyyəti dəfələrlə bəyan edib ki, Ermənistana ərazisi iddiası yoxdur. Amma sülh müqaviləsini imzalamaqdan yayınan Ermənistan hər vəchlə bəhanələr tapır. Erməni politoloqlar da Azərbaycanı “günahkar” çıxarmaq üçün ictimai rəyə təsir etməyə çalışırlar.
Ermənistan və Azərbaycanın dövlət strukturları arasında ictimai yazışmalar da ermənilər arasında böyük narahatlıq doğurub.
“Voskanapat” analitik mərkəzinin direktoru, politoloq Hrant Melik-Şahnazaryan “Sputnik Ermənistan”a müsahibəsində bildirib ki, Ermənistan əslində Azərbaycanın istənilən tələbini yerinə yetirməyə hazır olmaqla özünü mümkün eskalasiyadan sığortalamağa, sadəcə olaraq bu müharibədən qaçmağa çalışır, Azərbaycan tərəfi isə əksinə, göstərir ki, hələ də narazıdır və problemlərini həll etmək üçün başqa yollar tapa bilir.
“Əsas problemlərdən biri ondan ibarətdir ki, Ermənistan Azərbaycanın təhdidlərinə adekvat hazırlaşmaq əvəzinə, sadəcə olaraq, günahı düşmənin üzərinə yıxmaq taktikasından istifadə etməyə çalışır və deyir: “Bax, onsuz da bizim günahımız yoxdur, gərginlikdən qaçmaq üçün hər şeyi etdik, lakin bu baş verdi”. Bu, ölkəmiz üçün yanlış və təhlükəli yanaşmadır və narahatlıq üçün kifayət qədər ciddi səbəblər var”, – Melik-Şahnazaryan bildirib.
Onun sözlərinə görə, Azərbaycan daim Ermənistanı təlatümdə saxlamağa çalışır və tələblər irəli sürür, onları beynəlxalq platformalarda öz fəaliyyətinin əsasına çevirir. Başa düşürlər ki, başqa kart yoxdur, hər şey onlara keçib, amma bunun onlara uyğun olmadığını deyir və yeni tələblər irəli sürürlər.
“Ermənistan hakimiyyəti nə qədər sülh dövründən, dünyanın qovşağından danışsa da, hamımız başa düşürük ki, Azərbaycanın belə məqsədləri yoxdur. Azərbaycanın bəyanatları vəziyyətin gərginləşməsindən xəbər verir və bunu gizlətmirlər”, – politoloq isterika içində iddia edib.
Politoloqun fikrincə, Azərbaycanın məqsədi Ermənistan ərazisi vasitəsilə Naxçıvanla əlaqə yaratmaq, Ermənistanla sərhəddə yaxşı postlar “zəbt etmək” və yeni ərazilər “qoparmaq”dır.
“İndi Ermənistan hakimiyyəti Azərbaycandan heç nə tələb edə bilməz. Onlar təslim sənədini bir neçə dəfə imzalayıblar.
Diktə edən tərəf Azərbaycandır və Ermənistan hakimiyyəti faktiki olaraq bölgədə Türkiyə-Azərbaycan maraqlarına xidmət edir”, – ekspert bildirib.
Azərbaycanla birbaşa danışıqların vasitəçisiz aparılmasına gəlincə, Melik-Şahnazaryan əmindir ki, bu, həm də Bakının tələbi idi.
Onun sözlərinə görə, Azərbaycan beynəlxalq ictimaiyyətin müəyyən bərabərlik işarələri qoymağa və ya Ermənistan-Azərbaycan danışıqlar prosesini müəyyən məntiqdə saxlamağa çalışdığını başa düşən andan dərhal sonra Ermənistanla birbaşa dialoqa başlamaq və bununla da istədiklərini almaq qərarına gəlib.
