Məşhur bolqar kahini Baba Vanqanın 2027-ci illə bağlı olduğu iddia edilən proqnozlar sosial mediada yenidən gündəmə gəlib. İddialara görə, həmin ildə qlobal iqtisadi böhran başlaya, bank sisteminə inam azala və qızılın qiyməti kəskin şəkildə arta bilər.
Sosial şəbəkələrdə yayılan məlumatlarda potensial maliyyə böhranı fonunda qızılın “təhlükəsiz sığınacaq” kimi ön plana çıxacağı və qiymətinin 25-40 faiz arta biləcəyi iddia olunur.
Bu ssenariyə əsasən, maliyyə sisteminə inamın azalması investorları ənənəvi qoruyucu aktivlərə yönəldə bilər. Belə vəziyyətdə qızılın qiymətində ciddi artımın baş verə biləcəyi ilə bağlı müxtəlif fərziyyələr irəli sürülür.
Lakin burada əsas sual bu proqnozların həqiqətən Baba Vanqaya aid olub-olmamasıdır.
Araşdırmalar göstərir ki, Baba Vanqanın 2027-ci ildə qlobal iqtisadi böhran, bank sisteminin çökməsi və ya qızılın qiymətinin 40 faiz artacağı barədə konkret və təsdiqlənmiş proqnoz verdiyini göstərən etibarlı mənbə yoxdur.
Baba Vanqanın adına müxtəlif illərdə çoxsaylı gələcək proqnozları aid edilib. Lakin onların böyük hissəsinin kahinin özünün sağlığında yazılı şəkildə qeydə alındığına dair sübutlar mövcud deyil. Bu səbəbdən sonradan sosial şəbəkələrdə yayılan belə iddialara ehtiyatla yanaşmaq tövsiyə olunur.
Qızılın 2027-ci ildə necə dəyişəcəyi ilə bağlı yayılan 25-40 faizlik artım rəqəmləri də konkret iqtisadi proqnoz və ya rəsmi hesabatla təsdiqlənmir. Bunlar əsasən internetdə yayılan fərziyyələrə əsaslanır.
