Kartof saxlanma şəraitinə qarşı kifayət qədər həssasdır: temperatur və rütubətdəki kiçik dəyişikliklər belə onun tez cücərməsinə, büzüşməsinə və acımtıl dad almasına səbəb olur. Buna görə düzgün saxlanma üsulu kartofun təravətini, sıxlığını və dadını xeyli müddət qorumağa kömək edir.
Demokrat.az kartofun cücərməsinin qarşısını necə almaq və onu hansı qabda saxlamağın yollarını təqdim edir.
Kartofu cücərməməsi üçün necə düzgün saxlamaq lazımdır?
Mütəxəssislər adətən saxlanma temperaturunun +2 ilə +4 dərəcə arasında olmasını tövsiyə edirlər. Temperatur daha yüksək olduqda kartof aktiv şəkildə cücərməyə başlayır, daha aşağı olduqda isə nişastada baş verən kimyəvi dəyişikliklər səbəbindən şirin dad alır.
Havanın rütubəti də az əhəmiyyət daşımır və onun 80–90 faiz səviyyəsində saxlanılması məsləhət görülür. Rütubət az olduqda kartof su itirərək yumşalır, həddindən artıq olduqda isə çürüməyə başlayır. Buna görə kartofu hava dövranı yaxşı olan yeşiklərdə və ya torbalarda saxlamaq daha məqsədəuyğundur. Hermetik qablarda isə tez kondensat yaranır.
İşığın miqdarı da mühüm rol oynayır. İşığın təsiri altında kartof yaşıllaşır və zərərli maddələr toplayır ki, bu da onu istifadəyə yararsız edir.
Bundan əlavə, ehtiyatları mütəmadi yoxlamaq və xarab olmağa başlayan kartofları ayırmaq lazımdır ki, onlar bütün məhsulun korlanmasını sürətləndirməsin.
Kartofun cücərməməsi üçün yeşiyə nə qoymaq olar?
Praktik baxımdan kartofu soğanla birlikdə saxlamaq tövsiyə edilmir, çünki bu tərəvəzlər bir-birinin cücərmə prosesini sürətləndirə bilər.
Əvəzində alma ilə qonşuluq faydalı hesab olunur. Almalar etilen adlı qaz ifraz edir və bu qaz az miqdarda olduqda cücərməni ləngitməyə, kartofun daha uzun müddət təzə qalmasına kömək edir. Əsas odur ki, almaların özü xarab olmağa başlamasın, əks halda təsir əksinə ola bilər.
Nəticə etibarilə, kartofun cücərməməsi üçün uyğun temperatur və rütubət balansı, qaranlıq mühit, hava dövranı və düzgün məhsul qonşuluğu təmin edilməlidir.
