Yaponiyada doğum nisbətini artırmaq üçün maraqlı qərar qəbul edilib.
Tokio hakimiyyəti rekord səviyyədə aşağı doğum səviyyəsini artırmaq məqsədilə bütün dövlət qulluqçuları üçün dördgünlük iş həftəsi tətbiq etməyi planlaşdırır.
Bu barədə CNN nəşri məlumat verib.
Qeyd edildiyi kimi, yeni qaydalar aprel ayından qüvvəyə minə bilər.
Bundan əlavə, şəhər rəhbərliyi uşaqları ibtidai məktəbdə oxuyan valideynlərə işdən tez çıxmaq imkanı müqabilində maaşlarının bir hissəsindən imtina etməyə icazə vermək niyyətindədir.
Nəşr bildirir ki, bir çox sosioloqlar Yaponiyada doğum səviyyəsinin aşağı düşməsini iş mədəniyyəti və yaşayış dəyərinin artması ilə əlaqələndirirlər.
Qeyd edək ki, daha əvvəllər bildirildiyinə görə, Yaponiyada rekord həddə aşağı doğum səviyyəsi və yüksək ölüm səviyyəsinə görə əhalinin azalması müşahidə olunur.
