Parisdə Fransa Prezidenti Emmanuel Makron, Ukrayna lideri Volodimir Zelenski və ABŞ-ın gələcək rəhbəri Donald Tramp arasında üçtərəfli görüş keçirilib.
Bu barədə BFMTV məlumat yayıb.
Telekanalın məlumatına görə, siyasətçilər təxminən yarım saat söhbət ediblər, bundan sonra ayrı-ayrılıqda Notr-Dam kilsəsinə yollanıblar. Zelenski və Tramp maşınlarına minməzdən əvvəl əl sıxıblar.
Zelenski görüşdən sonra “Telegram” kanalında əməliyyatları mümkün qədər tez bitirmək istəyindən söz açıb.
Ukrayna liderinin sözlərinə görə, görüş yaxşı və məhsuldar olub və amerikalı siyasətçi həmişə olduğu kimi, qərarlıdır.
“Biz xalqımız, döyüş meydanındakı vəziyyət və Ukrayna üçün ədalətli dünya haqqında danışdıq. Biz hamımız bu müharibəni mümkün qədər tez və ədalətli şəkildə bitirmək istəyirik”, – deyə Zelenski bildirib.
O əlavə edib ki, görüş iştirakçıları işi davam etdirmək barədə razılığa gəliblər.
O paylaşımını “Güclə sülh mümkündür!” ifadəsi ilə bitirib.
