Məlum olduğu kimi, sabah, oktyabrın 26-da Gürcüstanda parlament seçkiləri keçiriləcək.
Siyasi partiyaların seçkiqabağı siyahılarında milli azlıqları təmsil edən namizədlərin sayı kifayət qədər azdır.
169 namizədin olduğu “Gürcü arzusu” partiyasının siyahısında milli azlıqların cəmi 4 nümayəndəsi var: 2-si etnik ermənidir. Bundan başqa, hakim partiyanın siyahısında iki azərbaycanlı var. Milli azlığı təmsil edən eyni sayda namizəd əvvəlki seçkilərdə də təmsil olunub. Həm 2016-cı, həm də 2020-ci ildə “Gürcü arzusu”nun siyahılarında 2-2 namizəd var idi.
Müxalifətin əsas koalisiyalarına gəlincə, sentyabrın 26-da “Dəyişikliklər Koalisiyası”nda (“Axali”, “Girçi: Daha Azadlıq”, “Jamanak”, “Respublika Partiyası”, “Gələcək Uğrunda Fəallar”) erməni namizəd yoxdur, amma bir azərbaycanlı var.
Sentyabrın 26-da “Güclü Gürcüstan” koalisiyası (“Lelo”, “Xalq naminə”, Ana Doldze, “Vətəndaşlar”, Aleko Elisaşvili, “Azadlıq meydanı”) seçkiqabağı siyahının bir hissəsini (26 nəfərlik siyahı) təqdim edib. Burada azlıqlar yoxdur.
“Birlik – Milli Hərəkat” (“Milli Hərəkat”, “Aqmaşenebel Strategiyası”, “Avropa Gürcüstanı”) koalisiyasının 98 nəfərlik siyahıda milli azlıqları təmsil edən 5 namizədi var. Biri etnik erməni, dördü isə azərbaycanlılar.
“Vətənpərvərlər Alyansı” koalisiyasının (“Vətənpərvərlər Alyansı”, “Alt İnfo”) 77 nəfərlik seçki siyahısında bir erməni namizədi var. Azərbaycanlı yoxdur.
Digər müxalif qüvvələr arasında “Gürcüstan naminə Qaxariya” partiyasının 115 nəfərlik seçki siyahısında cəmi 1 etnik azlıq namizədin adı var. “Sol Alyansın” 34 nəfərlik seçki siyahısında 1 nəfər erməni millətindən olan namizəd var.
“Qırçı”, “Əmək Partiyası” və “Avropa Demokratları”nın seçki siyahılarında etnik azlıqdan namizəd yoxdur.
Seçkilərdə iştirak edən digər siyasi partiyalara gəlincə, təəssüf ki, onların siyahıları haqda heç bir məlumat yoxdur.
Gürcüstan Milli Statistika Xidmətinin son məlumatlarına görə, etnik azlıqlar Gürcüstan əhalisinin 13,2 faizini təşkil edir ki, onların da 4,5 faizini (168 102 nəfər) etnik ermənilər, 6,3 faizini (233 024 nəfər) isə azərbaycanlılar təşkil edir.
