Dövlət satınalmalarında şübhəli məqamlarla bağlı ciddi narahatlıq yaradan səbəblər var.
İcra hakimiyyətləri başda olmaqla ayrı-ayrı dövlət qurumlarının keçirdiyi tenderlərdə eyni şirkətlərin davamlı olaraq qalib gəlməsi bu sahədə şəffaflıq məsələsini aktuallaşdırır.
Məsələn, bu gün, yəni dekabrın 9–da keçirilən Sabunçu rayon ərazisində asfalt örtüyünün təmir işlərinin satınalınmasında qalib olan “VEST-LTD” QSC ardıcıl olaraq eyni sahədə fəaliyyət göstərən qurumların tenderlərini qazanır. Bu gün keçirilən tenderə əsasən, şirkətə 292 min 914 manat 52 qəpik ödəniləcək.Şirkətlə bağlı apardığımız araşdırmalar zamanı məlum oldu ki, “VEST-LTD” QSC son bir ildə 22 tender qazanıb. Bu satınalmaları həyata keçirən qurumlar əsasən icra hakimiyyətləri və Mədəniyyət Nazirliyinin qurumları olub. Şirkət ötən il Təhsil Nazirliyindən, cari ildə isə Maliyyə Nazirliyinin Xəzinədarlıq Agentliyi və Dövlət Turizm Agentliyindən 1 tender udub. Əsasən, təmir-tikinti, abadlıq işləri və intentarların satın alınması üzrə keçilən 23 tenderdən şirkətə 12 milyon 51 min 299 manat 89 qəpik ödənilib.
2010-ci ildə dövlət qeydiyyatına alınmış və nizamnamə kapitalı 2050 manat olan “Vest -LTD” Məhdud Məsuliyyətli Cəmiyyətin qanuni təmsilçisi Şahin Verdəliyevdir.
“Vest LTD” QSC təkcə tenderlərdə deyil, katirovka sorğularında da fəaldır. Şirkət bu il 1№-li Bakı Tibb Kollecinin elan etdiyi kotirovka sorğusunun da qalibi olub. 22.09.2020-ci il tarixdə tərəflər arasında üç lot üzrə müqavilə bağlanıb: 1) Cari təmirlə bağlı 44608 manat. 2) Əsaslı təmirlə bağlı 48729 manat. 3) Abadlaşdırma ilə bağlı 9766 manat.
Maraqlıdır ki, tenderləri “qazanmaq”da professional olan şirkətin saytı, nə də sosial şəbəkələrdə səhifəsi var.
Mediada səslənən iddialara görə, “VEST LTD” QSC faktiki olaraq Bakı Şəhər İcra Hakimiyyətində tender kralı kimi tanınan Hacı Ramazan Mirzəyevə məxsusdur.
Ramazan Mirzəyevlə bağlı mediada dərc olunan məlumatların araşdırılmasından da məlum oldu ki, “iş adamı” Maliyyə Nazirliyinin Xəzinədarlıq Agentliyindən tutmuş İcra Hakimiyyətləri və Mədəniyyət Nazirliyininin satınalmalarında daim “qalib” gəlir. İş adamı ilə bağlı yayılan ilginc informasiyalardan biri də onun tenderləri qazanan şirkətləri tez-tez bir-biri ilə əvəz etməsidir. Məsələn, 2018-19-cu illərdə Bakı Şəhər İcra Hakimiyyəti ilə tender müqaviləsi bağlayan əsasən “Yukon-K”, “Astok-5”, “Foodr 21”, “Vinsfud”, “Vertus 2018”, “Local LLC”, “Green SS”, “Ardo-2017”, “Təchizat Servis-18”, “Hermes-R Group”, “Staples Holding”,”Aztex-NN Servis”, “Gibernes MM”, “Katlos 2020”, “Local LLC”, “Forvard-SS”, “Olimpic HH”, “Kross Good”, “Faraon 200”, “Rudel Marketing” MMC-nin Ramazan Mirzəyevə yaxın olduğu iddia olunur.
Mediada tender mafiyası kimi təqdim olunan Ramazan Mirzəyev və onun daxil olduğu şəbəkənin ən məşhur şirkətlərindən biri də “İnpeks.N” MMC-dir. “İnpeks.N” şirkəti 28.03.2019 – 24.10.2019 dövründə (179 gündə) malların (işlərin və xidmətlərin) satınalınması üzrə 234 müsabiqənin qalibi olub. Şirkət bağladığı müqavilələr üzrə 73 milyon 320 milyon manat gəlir əldə edib.
“İnpeks.N” şirkəti 2019-cu ildə ən böyük müqaviləni Bakı Şəhər İcra Hakimiyyəti başçısının tabeliyindəki “Bakı Şəhər Əsaslı Tikinti və Təmir” MMC ilə bağlayıb. Bakı şəhər ərzazisində səkilərdə, həyətlərdə, park və bağlarda təmir, yenidənqurma və abadlıq işlərinin satınalıınmasını nəzərdə tutan həmin müqavilənin məbləği 16 milyon 19 min manatdır. Həmçinin, MMC “İnpeks.N” ilə Bakı Şəhər ərazisində tikinti və təmir işlərinin aparılmasının satınalınması üzrə 2 milyon 575 min manatlıq müqavilə imzalayıb.
Ötən ilin oktyabr ayının ötən dövründə Bakı Şəhər İcra Hakimiyətinin tabeliyində olan Bakı Şəhər Məktəbəqədər Təhsil Müəssisələri və Uşaq evləri İdarəsi “İnpeks.N” şirkətilə 15 milyon 713 milyon manat məbləğində 10 müqavilə bağlayıb.
“İnpeks.N” şirkəti Bakı Şəhər Mənzil Kommunal Təsərrüfat Departamentinin (Rayon Mənzil-Kommunal Təsərrüfatı Birlikləri üçün) və Mədəniyyət Nazirliyinin elan tenderlərin də qalibi olub.
Maraqlıdır ki, son aylar “İnpeks.N” MMC tenderləri qazanan şirkətlərin siyahısından çıxıb.
Qaynarinfo-nun satınalmalar üzrə apardığı araşdırmalar nəticəsində məlum oldu ki, məşhur “İnpeks.N” MMC-ni indi “Tikinti-Təmir-Təchizat-Bərpa” QSC və “VEST-LTD” QSC şirkətləri əvəzləməkdədir.
Hər iki şirkətin satınalmalarda iştiark etməsi tarixi təxminən eynidir və bu tarix “İnpeks.N”-in gölgəyə çəkilməsi zamanına uyğundur.
Belə ki, “VEST-LTD” QSC ilk tenderini ötən ilin sentyabrın 25-də, “Tikinti-Təmir-Təchizat-Bərpa” QSC isə oktyabrın 4-də qazanıb.
Bu iki şirkəti həm nizamnamə kapitalının eyni olması (2050 manat) və təşkilati-hüquqi formasıdır (Qapalı Səhmdar Cəmiyyətidir).
Qeyd edək ki, “Tikinti-Təmir-Təchizat-Bərpa” QSC dekabrın 7-də keçirilən dövlət satınalmalarında 2 qurumdan 5 tender udub. Bu şirkət son 14 ayda 39 tender qazanıb ki, bu satınalmaları da Bakı şəhərindəki icra hakimiyyətləri və Mədəniyyət Nazirliyinin müvafiq qurumları keçirib. Şirkət 2015-ci ilin mart ayının 18-də dövlət qeydiyyatına alınıb. Şirkətin hüquqi ünvanı General Səmədbəy Mehmandarov, ev 98, mənzil 47, qanuni təmsilçisinin isə Əbilov Elçin İslam oğlu göstərilib.
Göründüyü kimi, sözugedən dəstəyə yaxın olan şirkətlər nazirlərin, Bakı merinin kim olmasından asılı olmayaraq tenderləri qazanmaqda davam edir. Bunun üçün ancaq şirkətlərin adını dəyişmək kifayət edir…
