Azərbaycanın ekoloji siyasəti son illərdə sürətli və ardıcıl şəkildə inkişaf edir. İqlim dəyişmələri ilə mübarizə, dayanıqlı şəhərsalma və ətraf mühitin qorunması sahəsində qəbul edilən qərarlar ölkənin bu istiqamətdə qlobal səviyyədə nüfuzunu artırır. Ölkəmiz ötən ilin noyabrında COP29-da beynəlxalq ekoloji müzakirələrə ev sahibliyi edərək bu sahədəki liderliyini daha da möhkəmləndirdi. Davamlı inkişafın və ekoloji şüurun artırılmasının vacibliyi günümüzdə daha çox önəm daşıyır. Bu istiqamətdə həyata keçirilən “Yaşıl dünyam” layihəsi ekoloji tarazlığın qorunması və gənc nəsildə təbiətə qarşı məsuliyyət hissinin artırılmasına yönəlib.
Saatlı rayonunun Məzrəli kənd tam orta məktəbi tərəfindən icra olunan bu layihə VIII qrant müsabiqəsinin qalibi olub və artıq bir çox ekoloji təşəbbüslərlə yerli icmanın diqqətini çəkib. Layihənin əsas məqsədi şagirdləri, valideynləri və yerli sakinləri bir araya gətirərək ətraf mühitin qorunmasına dair maarifləndirici tədbirlər və praktiki fəaliyyətlər həyata keçirməkdir.
Layihə çərçivəsində görülən işlər aşağıdakılardır:
– Ağacəkmə aksiyalarının təşkili;
– Şagirdlər üçün ekoloji seminarlar və təlimlər;
– Məktəb ərazisinin yaşıllaşdırılması və abadlaşdırılması;
– İctimaiyyətin ekoloji məsələlərə marağını artıran kampaniyalar.
Bu layihə yalnız bugünkü ekoloji problemlərin həllinə töhfə verməklə kifayətlənmir, eyni zamanda gələcək nəsillərə daha yaşıl və sağlam bir dünya miras qoymaq məqsədi daşıyır. İnanırıq ki, şagirdlərin və yerli icmanın fəal iştirakı ilə ekoloji mədəniyyəti inkişaf etdirmək və təbiətə qayğı göstərmək mümkündür.
Qeyd edək ki, təhsildə inkişaf və innovasiyalar üzrə VIII qrant müsabiqəsinin qalibi “Yaşıl dünyam” layihəsinin icrası artıq yekunlaşıb.
Layihə çərçivəsində Saatlı rayonunun bir sıra ümumi təhsil məktəblərinin şagirdləri tərəfindən 500-ə yaxın ağac əkilib. Eyni zamanda mütəxəssislər tərəfindən şagirdlərə ağacları əkmək, onlara qulluq qaydaları haqqında geniş məlumat verilib. Bundan əlavə, “Yaşıl dünyam”ı təşviq edən rəsm və əl işlərindən ibarət şagirdlərin sərgisi təşkil olunub.
Onu da qeyd edək ki, “Yaşıl dünyam” layihəsini Saatlı rayonunun Məzrəli kənd tam orta məktəbinin direktoru Samir Məmmədov həyata keçirib. Layihənin açılışı zamanı layihə rəhbəri Saatlı Rayon Təhsil Sektorunun müdiri Günay Sultanovanı, eləcə də layihəyə cəlb olunmuş rayonun ümümi təhsil məktəblərinin şagird və müəllimlərini layihənin məqsədi haqqında geniş məlumatlandırıb. Layihənin məqsədi əməksevərliyi və əməkdaşlığı təbliğ etmək, istedadlı şagirdləri önə çıxartmaq və onlara dəstək olmaq, təbiəti sevmək və qorumaq hissini aşılamaqdır.
Odur ki, gəlin birlikdə təbiətə dəyər verək!
Həsrət RÜSTƏMOV
