Vətəndaşla kobud davranan polis əməkdaşı cəzalandırılıb.Tovuz rayon Qovlar şəhər sakini Vaqif Əhmədovun Tovuz Rayon Polis Şöbəsinin (RPŞ) Qovlar Şəhər Polis Bölməsinin əməkdaşı, polis mayoru Paşa Rzayev tərəfindən təhqir edilməsi ilə bağlı bəzi informasiya saytlarında dərc olunmuş xəbərə Daxili İşlər Nazirliyinin mətbuat xidmətinin Gəncə regional qrupundan Unikal.org-a münasibət bildirilib.
Qrupun baş inspektoru, polis leytenantı Eşqin Qasımov bildirib ki, Tovuz rayonunun Qovlar şəhər sakini Vaqif Əhmədov 23.08.2019-cu il tarixində DİN-in “102” Xidməti-Zəng Mərkəzinə, daha sonra Tovuz RPŞ-yə müraciət edərək RPŞ-nin Qovlar Şəhər Polis Bölməsinin sahə rəisi, polis mayoru Paşa Rzayevin onunla kobud davranmasını bildirib. Müraciət ilə əlaqədar RPŞ-də müvafiq araşdırmalar aparılıb. Polis mayoru P. Rzayevin V. Əhmədovla yersiz mübahisəsi, ona qarşı etik-davranış qaydalarından kənar ifadələr işlətməsi öz təsdiqini tapmasa da, xidməti vəzifəsinin icrasına məsuliyyətsiz yanaşmasına görə barəsində intizam tənbehi görülüb.
“Bundan başqa Vaqif Əhmədov Tovuz RPŞ-yə dəvət olunaraq araşdırmanın nəticəsi barədə ona məlumat verilib. Vətəndaş isə öz növbəsində müraciətinə operativ və obyektiv baxıldığına görə DİN rəhbərliyinə öz təşəkkürünü bildirib”, – deyə E. Qasımov qeyd edib.
