Ukrayna Silahlı Qüvvələrinin (AFU) fəaliyyəti ilə əlaqədar 11 minə yaxın insan Belqorod vilayətinin Krasnoyaruzski rayonunu tərk edib.
Bu barədə rayon administrasiyasının başçısı Andrey Miskov özünün Telegram kanalında məlumat verib.
“Hazırda ərazidə qalan 11,5 min sakindən 11 min nəfəri uğurla təxliyə edilib. Təxminən 500 nəfər, o cümlədən administrasiya əməkdaşları öz işlərində qalır”, – məmur yazıb.
Onun sözlərinə görə, sakinlər idarənin, özünümüdafiə qüvvələrinin, Fövqəladə Hallar Nazirliyinin və təcili tibbi yardım maşınlarının köməkliyi ilə mərkəzləşdirilmiş qaydada və hazırlanmış avtobuslarda yola düşüblər. Miskov sakinlərin köçürülməsi istiqamətində işlərin davam etdiriləcəyini vurğulayıb.
Bundan əvvəl Kursk vilayətinin başçısı səlahiyyətlərini icra edən Aleksey Smirnov çətin əməliyyat vəziyyəti elan edib. Rəsminin sözlərinə görə, regional hakimiyyət sosial xidmətlər və ictimai təşkilatlarla birlikdə vəziyyəti normallaşdırmaq üçün çalışır.
