Zəlzələ proqnozları ilə məşhurlaşan hollandiyalı mütəxəssis Frank Huqerbitsin Türkiyədə baş verən zəlzələ ilə bağlı paylaşımı diqqət çəkib.
Huqerbetsin fevralın 3-də sosial şəbəkələrdə etdiyi paylaşımda qeyd edilib ki, “gec-tez bu bölgədə (Cənubi-Mərkəzi Türkiyə, İordaniya, Suriya, Livan) 7,5 bal zəlzələ olacaq”.
Huqerbits zəlzələdən sonra başqa bir paylaşım edərək, “Ürəyim Türkiyənin mərkəzi bölgəsində baş verən böyük zəlzələdən zərər çəkən hər kəsin yanındadır. Daha əvvəl də qeyd etdiyim kimi, gec-tez bu bölgədə 115 və 526-cı illərdə olduğu kimi zəlzələ olacaq”.
Qeyd: 13 dekabr 115-ci il tarixində Antakyada baş verən 7.5 bal gücündə zəlzələ Antakya və ətraflarında təxminən 260 000 insanın ölümünə və çox ciddi maddi ziyana səbəb olub. Bu zəlzələ Türkiyə coğrafiyası sərhədləri daxilində ən çox insan itkisinə səbəb olan zəlzələ olaraq qeyd edilib. 526-cı il mayın sonlarında Antakyada yenidən dəhşətli zəlzələ baş verib, təxminən 250 000 insan həlak olub. Bu hadisə altıncı ən ölümcül təbii fəlakət və ikinci ən ölümcül zəlzələ kimi tarixə düşüb.
“Fevralın 4-5-də olduğu kimi, kritik planet həndəsəsi həmişə bu zəlzələlərdən əvvəl olur. Mərkəzi Türkiyə və yaxın bölgələrdə əlavə güclü seysmik aktivliyə diqqət yetirin. Böyük zəlzələdən sonra, adətən, artterşoklar bir müddət davam edir”, – deyə o bildirib.
Huqerbits əvvəllər Türkiyədə baş verən bir çox zəlzələləri proqnozlaşdırıb. Avstraliyalı astronom zəlzələ üzrə mütəxəssis kimi bütün dünyada öz proqnozları ilə tanınır.
Qeyd edək ki, ötən gecə Türkiyədə 7.4 bal gücündə zəlzələ olub. Son məlumatlara görə, təbii fəlakət nəticəsində ölənlərin sayı 284 nəfərə çatıb, 2323 nəfər yaralanıb, 1710 nəfər dağıntılar altında qalıb.
