Qərb Avrasiya İqtisadi İttifaqdan (Aİİ) çıxması üçün Ermənistana təzyiq göstərir.
Bu barədə “Past” qəzeti yazıb.
“Hətta Ermənistan hakimiyyət orqanlarının daim Aİİ bazarının ölkənin ixracının həcmi üçün xüsusi əhəmiyyət kəsb etdiyini söyləməsinə baxmayaraq, bizdə olan məlumata görə, daxildə tamamilə fərqli münasibət var. O cümlədən, mənbələrimiz iddia edir ki, Nikol Paşinyan komandaya dəfələrlə eyham vurub ki, Qərbdən Aİİ-dən çıxmaq üçün açıq təzyiqlər var və o, bu tələblərə sadəcə əl yelləməklə kifayətlənmir. Paşinyan digər addımlarında olduğu kimi bu məsələdə də məsələni xalqın “cibinə” atmağa, hadisələri elə təşkil etməyə çalışacaq ki, onlar bir daha desinlər: “Yaxşı, mən nə edə bilərdim? Bunu qürurlu vətəndaş tələb edir”.
Üstəlik, yaxın gələcəkdə onların nəinki yeni anti-Rusiya dalğaları yaradacaqları, həm də ayrı-ayrı “qaynar ocaqları” bu məntiqlə istiqamətləndirməyə çalışacaqları barədə məlumatlar var.
Həmsöhbətlərimizdən birinin dediyinə görə, dünən Martuni sakinləri tərəfindən Martuni-Qavar avtomobil yolunun bağlanması bu ssenariyə uyğunlaşdırılıb. Hakimiyyətə qarşı təşkil olunmuş aksiya təsadüfi deyildi, səsləndirilən tezislərin əksəriyyəti anti-Rusiya və anti-Aİİ idi”, – nəşr yazıb.
