Səhiyyə Nazirliyi 1 nömrəli Respublika Psixiatriya Xəstəxanasında A.R (ad şərtidir) adlı vətəndaş döyülüb.
Bu barədə vətəndaşın qardaşı məlumat verib.
İddia edilib ki, qardaşı xəstəxanada vəhşicəsinə döyülərək koma vəziyyətinə salınıb:
“Qardaşım gizli şəkildə gecə ilə Respublika Neyrocərrahiyyə Xəstəxanasına gətirilib”.
Vətəndaş bildirib ki, hadisəni ört-basdır etmək üçün hüquq-mühafizə orqanlarına məlumat verməyiblər.
Məsələ barədə Səhiyyə Nazirliyi ilə əlaqə saxladıq.
Nazirlikdən Oxu.Az-ın sorğusuna cavab olaraq bildirilib ki, xəstəxana rəhbərliyi tərəfindən qeydə alınan fakt barədə hüquq-mühafizə orqanları məlumatlandırılıb:
“Xəstəxanaya gələn polis və prokurorluq əməkdaşları araşdırmalara başlayıblar. Təhlükəsizlik kameralarının görüntüləri də götürülüb. Araşdırmalar başa çatdıqdan sonra istintaq orqanı fakta hüquqi qiymət verəcək”.
