Ramazan ayında orucu açmaq üçün bir çox müxtəlif qidalar tövsiyə edilir. Orucu şorba, su, xurma və ya zeytunla açmağa üstünlük verənlər daha çoxdur.
Son illərdə həkimlər uzun müddət ac qaldıqdan sonra orucu şirin bir qida ilə, yəni xurma ilə açmağın zərərli ola biləcəyini deyirlər. Ancaq bəzi mütəxəssislər əksinə orucu xurma ilə açmağın çox vacib olduğunu bildirirlər.
Xurma çox yüksək qida dəyəri sayəsində doyurucudur. Həmçinin şirniyyat istəyinin qarşılanmasında rol oynayır. Bu xüsusiyyətləri ilə xurma iftar zamanı ilk üstünlük verilən qidalar arasındadır.
Lif mənbəyi olan xurma insana enerji verir və oruc tutan insanın əvvəlcə qan şəkərini nizamlayaraq yorğunluğunu alır. Ona görə də iftarda xurma ilə oruc açmaq sağlamlıq üçün mühümdür. Xurma ilə iftar etmək ilk mərhələdə toxluq hissi verəcək və daha az yeməyə səbəb olacaq.
Hədis alimi Əbu Davud Məhəmməd peyğəmbərin iftarını bu sözlərlə nəql edib:
“Rəsulullah (s) axşam namazını qılmazdan əvvəl bir neçə ədəd təzə xurma ilə iftar edərdi. Əgər təzə xurma olmasaydı, quru xurma ilə açardı. Quru xurma tapmayanda isə bir neçə qurtum su içərdi”.
Uzun müddətli orucdan sonra qan şəkərini tarazlaşdırmaq, iftarda həddindən artıq yeməyin qarşısını almaq və enerjinizi artırmaq üçün xurma ilə iftar etmək sağlamlıq baxımından faydalı ola bilər.
Lakin xurma kimi şəkərli qidalar həddindən artıq istehlak edildikdə, lazımsız enerji qəbuluna səbəb ola bilər. Bu da çəki artımına gətirib çıxarır.
Yeməyə su ilə başlamaq da bütün gün susuz qalan bədən üçün faydalıdır. (Medicina.az)
